கோலாலம்பூர், 04 ஜூன் 2026 : மலேசியா மற்றும் வெளிநாடுகளைச் சேர்ந்த எரிசக்தித் துறை நிபுணர்கள், முதலீட்டாளர்கள் மற்றும் தொழில்துறை பிரதிநிதிகளை ஒருங்கிணைக்கும் “எனர்ஜி டிரான்ஸிஷன் கான்பரன்ஸ் (ETCon) 2026” மாநாட்டை மலேசிய பிரதமர் டத்தோ ஸ்ரீ அன்வார் இப்ராஹிம் இன்று அதிகாரப்பூர்வமாகத் தொடங்கி வைத்தார்.
நிலையான மற்றும் எதிர்காலத் தேவைகளுக்கு ஏற்ப எரிசக்தித் துறையை மேம்படுத்துவதற்கான புதிய அணுகுமுறைகள், தொழில்நுட்பங்கள் மற்றும் மூலோபாயங்களைப் பகிர்ந்து கொள்ளும் முக்கிய தளமாக இந்த மாநாடு விளங்குவதாக அவர் தெரிவித்தார்.
உலகளாவிய எரிசக்தித் துறையின் எதிர்காலம் புதிய சிந்தனைகளையும் துணிச்சலான முடிவுகளையும் கோருகிறது என்று குறிப்பிட்ட பிரதமர், மத்திய கிழக்கில் நீடித்து வரும் பதற்ற நிலை உலக நாடுகள் முழுமையாக புதைபடிவ எரிபொருட்களை மட்டுமே சார்ந்து இருக்க முடியாது என்பதை தெளிவாக எடுத்துக்காட்டுவதாக கூறினார்.
இதன் காரணமாக, சுத்தமான, நிலையான மற்றும் நீண்டகால பயன்பாட்டிற்கு ஏற்ற புதுப்பிக்கத்தக்க எரிசக்தி வளங்களுக்கான மாற்றத்தை விரைவுபடுத்துவது அவசியமாகியுள்ளது என்றும் அவர் வலியுறுத்தினார்.
அதேவேளை, செயற்கை நுண்ணறிவு (AI), டிஜிட்டல் பொருளாதாரம் மற்றும் அரைக்கடத்தி தொழில்துறையின் விரைவான வளர்ச்சி, உலகளவில் தரவு மையங்களின் (Data Centres) எண்ணிக்கையை அதிகரித்துள்ளதாகவும், இதனால் நிலையான மற்றும் போதுமான மின்சார விநியோகத்திற்கான தேவை தொடர்ந்து உயர்ந்து வருவதாகவும் அவர் சுட்டிக்காட்டினார்.
இந்தச் சூழலில், ஆற்றல் மாற்றக் கொள்கைகள் வெறும் சுற்றுச்சூழல் பாதுகாப்பு முயற்சியாக இல்லாமல், பொருளாதார வளர்ச்சிக்கும் தொழில்நுட்ப முன்னேற்றத்திற்கும் அடிப்படையான உத்தியாக மாறியுள்ளதாக பிரதமர் தெரிவித்தார்.
மேலும், ஆசியான் மின் வலையமைப்பு (ASEAN Power Grid) திட்டத்தை வெற்றிகரமாக செயல்படுத்துவதில் மலேசியா முழுமையான அர்ப்பணிப்புடன் செயல்பட்டு வருவதாகவும் அவர் உறுதியளித்தார். இந்த முயற்சி, ஆசியான் நாடுகளுக்கிடையேயான எரிசக்தி ஒத்துழைப்பை வலுப்படுத்துவதோடு, வளங்களை ஒருங்கிணைந்த, திறமையான மற்றும் பாதுகாப்பான முறையில் பகிர்ந்து கொள்ள உதவும் என்றும் அவர் குறிப்பிட்டார்.
எரிசக்தித் துறையில் நிலையான வளர்ச்சியை நோக்கி உலக நாடுகள் ஒன்றிணைந்து செயல்பட வேண்டிய அவசியத்தை இந்த மாநாடு மீண்டும் வலியுறுத்துவதாகவும், பசுமை ஆற்றல் எதிர்காலத்தை உருவாக்குவதில் மலேசியா தொடர்ந்து முன்னணி பங்காற்றும் என்றும் டத்தோ ஸ்ரீ அன்வார் இப்ராஹிம் தெரிவித்தார்.
