கோலாலம்பூர், 04 ஜூன் 2026 : கோலாலம்பூர் புகைப்பட விழாவின் (Kuala Lumpur Photography Festival – KLPF) 30-வது ஆண்டு கொண்டாட்டத்தை முன்னிட்டு, “SMILE Is a Many-Splendoured Thing” என்ற கருப்பொருளில் நடைபெறவுள்ள ஆண்டு புகைப்படக் கண்காட்சிக்கான படைப்புகளை உலகம் முழுவதும் உள்ள புகைப்படக் கலைஞர்களிடமிருந்து வரவேற்கப்படுவதாக ஏற்பாட்டாளர்கள் அறிவித்துள்ளனர்.
ஒரு புன்னகை மொழி, இனம், நாடு என அனைத்து எல்லைகளையும் கடந்து மனிதர்களை இணைக்கும் பொதுவான உணர்வாகும். அன்றாட வாழ்க்கையில் நிகழும் சிறிய தருணங்கள், குழந்தைகளின் இயல்பான மகிழ்ச்சி, நட்பின் பாசம், குடும்ப உறவுகள், திருவிழாக்கள், சந்தைகள் மற்றும் கிராமப்புற வாழ்க்கையின் எளிமையான காட்சிகள் ஆகியவற்றில் வெளிப்படும் புன்னகைகளை புகைப்படங்களாக பதிவு செய்து உலகுடன் பகிர்ந்து கொள்ளுமாறு கலைஞர்களுக்கு அழைப்பு விடுக்கப்பட்டுள்ளது.
மேலும், “Visit Malaysia 2026” சுற்றுலா ஆண்டை முன்னிட்டு, மலேசியாவின் விருந்தோம்பல், ஒற்றுமை மற்றும் பன்முக கலாசாரத்தை பிரதிபலிக்கும் புன்னகைகளை பதிவு செய்ய மலேசிய புகைப்படக் கலைஞர்கள் சிறப்பாக ஊக்குவிக்கப்பட்டுள்ளனர்.
ஒரு புகைப்படம் ஆயிரம் வார்த்தைகளைப் பேசும் என்பதுபோல், ஒவ்வொரு புன்னகையும் ஒரு தனித்துவமான கதையைச் சொல்கிறது. மகிழ்ச்சி, அமைதி, விளையாட்டுத்தனம் அல்லது எதிர்பாராத தருணங்களில் பிறக்கும் புன்னகைகள் மூலம் உலகை ஒன்றிணைப்பதே இந்தக் கண்காட்சியின் நோக்கமாகும் என்று ஏற்பாட்டாளர்கள் தெரிவித்துள்ளனர்.
இந்தப் போட்டியில் ஒரு பங்கேற்பாளர் அதிகபட்சம் 10 புகைப்படங்கள் வரை சமர்ப்பிக்கலாம். பதிவு கட்டணமாக RM20 அல்லது அமெரிக்க டாலர் 6 நிர்ணயிக்கப்பட்டுள்ளது.
புகைப்படங்களை சமர்ப்பிப்பதற்கான கடைசி தேதி மற்றும் போட்டி விதிமுறைகள் தொடர்பான விவரங்களை KLPF-இன் அதிகாரப்பூர்வ இணையதளம் மற்றும் கூகுள் படிவத்தின் மூலம் அறிந்து கொள்ளலாம். மேலும் தகவல்களுக்கு klpf@pcp2u.my என்ற மின்னஞ்சல் முகவரியிலும், +60 16-715 1703 என்ற வாட்ஸ்அப் எண்ணிலும் தொடர்பு கொள்ளலாம். 
Submit via Google Form: https://bit.ly/KLPF2026_Smile 
Terms & Conditions: https://bit.ly/KLPF2026_SmileTnC_00 
Participation Fee: RM20 or USD6 (up to 10 images)
