கோலாலம்பூர், 03 ஜூன் 2026 : 2026 கோலாலம்பூர் சர்வதேச புத்தகக் கண்காட்சியில் (PBAKL 2026) தேசிய கலைக்கூடத்தின் (Balai Seni Negara) அரங்கம் பார்வையாளர்களின் கவனத்தை ஈர்த்து வருகிறது.
புத்தக ஆர்வலர்கள், கலை நேயர்கள் மற்றும் குடும்பத்தினருக்காக பல்வேறு சலுகைகள் மற்றும் படைப்பாற்றல் நிகழ்ச்சிகளுடன் தேசிய கலைக்கூடம் தனது அரங்கில் சிறப்பு ஏற்பாடுகளை செய்துள்ளது.
இந்த அரங்கில் தேசிய கலைக்கூடம் வெளியிட்டுள்ள நூல்கள் மற்றும் நினைவுப் பரிசுப் பொருட்கள் சிறப்பு தள்ளுபடியில் விற்பனை செய்யப்படுகின்றன. இதனால் பார்வையாளர்கள் மத்தியில் நல்ல வரவேற்பு கிடைத்துள்ளதாக தெரிவிக்கப்பட்டுள்ளது.
அத்துடன், டூடுள் மற்றும் கார்ட்டூன் வரைதல், ‘Knitted Wire Art’ கலைப் பயிற்சி, “விரல்களிலிருந்து இதயத்திற்கு” என்ற கருப்பொருளில் கலைஎழுத்துப் பயிற்சி, மேலும் “Pressed Flower Keychain & Frame” தயாரிக்கும் நேரடி காட்சிகள் உள்ளிட்ட பல்வேறு படைப்பாற்றல் நடவடிக்கைகளும் ஏற்பாடு செய்யப்பட்டுள்ளன.
கலை மற்றும் இலக்கிய ஆர்வலர்களுக்கு மட்டுமல்லாமல், குழந்தைகள் மற்றும் குடும்பங்களும் பங்கேற்று பயனடையும் வகையில் இந்த நிகழ்ச்சிகள் வடிவமைக்கப்பட்டுள்ளன.
கோலாலம்பூர் உலக வர்த்தக மையத்தில் (World Trade Centre Kuala Lumpur) நடைபெற்று வரும் இந்த கண்காட்சி, மே 29 முதல் ஜூன் 7 வரை தினமும் காலை 10 மணி முதல் இரவு 10 மணி வரை திறந்திருக்கும்.
தேசிய கலைக்கூடத்தின் அரங்கம், டுன் ஹுசைன் ஒன் மண்டபம், இரண்டாம் தளம், அரங்கு எண் 403-இல் அமைந்துள்ளது. பொதுமக்களுக்கு இலவச அனுமதி வழங்கப்பட்டுள்ளதால், கலை மற்றும் இலக்கிய ஆர்வலர்கள் இந்த வாய்ப்பை பயன்படுத்திக் கொள்ளுமாறு ஏற்பாட்டாளர்கள் அழைப்பு விடுத்துள்ளனர்.
“கலை, இலக்கியம் மற்றும் படைப்பாற்றலை ஒரே இடத்தில் அனுபவிக்க விரும்புவோர் அனைவரும் தேசிய கலைக்கூட அரங்கிற்கு வருகை தரலாம்” என்று அவர்கள் தெரிவித்துள்ளனர்.
