கோலாலம்பூர், 29 மே 2026 : சிங்கப்பூர் ஓபன் சூப்பர் 750 பேட்மிண்டன் தொடரில் மலேசிய வீரர்களின் பயணம் காலிறுதி சுற்றுடன் நிறைவடைந்தது. போட்டியில் பங்கேற்ற நான்கு ஜோடிகளும் தோல்வியடைந்ததால், மலேசியாவின் சவால் முடிவுக்கு வந்துள்ளது.
சிங்கப்பூர் உட்புற விளையாட்டு அரங்கில் நடைபெற்ற ஆடவர் இரட்டையர் காலிறுதி ஆட்டத்தில் உலகின் இரண்டாம் நிலை ஜோடியான ஆரோன் சியா – சோ வூய் யிக், சீனாவின் லியாங் வேய் கெங் – வாங் சாங் ஜோடியிடம் நேர்செட்களில் 15-21, 15-21 என்ற கணக்கில் தோல்வியடைந்தனர். வெறும் 31 நிமிடங்களில் முடிவடைந்த இந்தப் போட்டியில், நடப்பு சாம்பியன்களான மலேசிய ஜோடியால் பட்டத்தை தக்கவைக்க முடியவில்லை.
இதற்கு முன்னதாக, கோ சி ஃபெய் – நூர் இஸ்ஸுடின் ரும்சானி ஜோடியும் இந்தோனேசியாவின் ஃபஜார் அல்ஃபியான் – முகம்மது ஷொஹிபுல் ஃபிக்ரி ஜோடியிடம் 18-21, 21-10, 14-21 என்ற கணக்கில் போராடி தோல்வியடைந்தது.
இளம் மலேசிய ஜோடியான ஆரோன் தாய் – காங் கை சிங், இந்தியாவின் சத்விக்சாய்ராஜ் ராங்கிரெட்டி – சிராக் ஷெட்டி ஜோடிக்கு எதிராக கடுமையான சவாலை வழங்கினாலும், 21-19, 17-21, 13-21 என்ற கணக்கில் 65 நிமிடப் போராட்டத்துக்குப் பிறகு தோல்வியை சந்தித்தனர்.
இதேவேளை, கலப்பு இரட்டையர் பிரிவில் சென் தாங் ஜியே – தோ ஈ வேய் ஜோடிக்கும் அதிர்ஷ்டம் கைகொடுக்கவில்லை. இந்தியாவின் துருவ் கபிலா – தனிஷா கிராஸ்டோ ஜோடிக்கு எதிரான காலிறுதி ஆட்டத்தின் முதல் செட்டில் 18-16 என முன்னிலையில் இருந்தபோது, ஈ வேய் முழங்கால் காயம் காரணமாக போட்டியிலிருந்து விலக நேரிட்டது.
இதன் மூலம் மலேசியாவின் அனைத்து பிரதிநிதிகளும் காலிறுதி சுற்றிலேயே வெளியேறினர். தொடரின் தொடக்கத்தில் நம்பிக்கை அளித்த மலேசிய ஜோடிகள் இறுதிக்கட்டத்தை எட்ட முடியாதது ரசிகர்களுக்கு ஏமாற்றமாக அமைந்துள்ளது.
எனினும், இளம் வீரர்களின் ஆட்டத்திறன் மற்றும் கடுமையான போட்டி மனப்பாங்கு எதிர்கால சர்வதேச தொடர்களுக்கான நம்பிக்கையை ஏற்படுத்தியுள்ளதாக விளையாட்டு வட்டாரங்கள் தெரிவித்துள்ளன.