கோலாலம்பூர், 29 மே 2026 : சான் சோ லின் (Chan Sow Lin) நிலையம் அருகே ஏற்பட்ட தடம் புரண்ட சம்பவத்தால் பாதிக்கப்பட்டுள்ள அம்பாங்/ஸ்ரீ பெட்டாலிங் LRT சேவை அடுத்த புதன்கிழமைக்குள் மீண்டும் இயங்கும் என மலேசிய போக்குவரத்து அமைச்சர் டத்தோ ஸ்ரீ அந்தோணி லோக் தெரிவித்துள்ளார்.
சம்பவத்தில் தொடர்புடைய ரயில் பெட்டிகள் கிரேன் உதவியுடன் அகற்றப்படும் பணிகள் தொடங்கப்பட்டுள்ளதாகவும், அதன் பின்னர் தண்டவாள பழுதுபார்ப்பு மற்றும் தொழில்நுட்ப சீரமைப்பு நடவடிக்கைகள் மேற்கொள்ளப்படும் என்றும் அவர் கூறினார்.
சேவை முழுமையாக வழக்கநிலைக்கு திரும்ப சுமார் ஒரு வாரம் முதல் பத்து நாட்கள் வரை ஆகக்கூடும் எனவும் அவர் விளக்கினார். இருப்பினும், சேவை மீண்டும் தொடங்கப்பட்ட பின்னர் பாதுகாப்பு காரணங்களுக்காக ரயில்களின் வேகம் கட்டுப்படுத்தப்படும் என்றும் தெரிவித்தார்.
ஆரம்பக் கட்ட விசாரணைகளின்படி, தண்டவாள மாற்று அமைப்பில் (switching system) ஏற்பட்ட கோளாறே இந்த விபத்திற்குக் காரணமாக இருக்கலாம் என சந்தேகிக்கப்படுகிறது. ரயிலின் முதல் பெட்டி புத்ரா ஹைட்ஸ் நோக்கிச் செல்லும் பாதையில் இருந்த நிலையில், பின்னர் வந்த பெட்டிகள் அம்பாங் நோக்கிச் செல்லும் பாதையில் திருப்பப்பட்டதாக கூறப்படுகிறது.
இதன் விளைவாக பின்புற பெட்டிகளின் இழுப்புச் சக்தி முன்புற பெட்டிகளை தண்டவாளத்திலிருந்து இழுத்து வெளியேற்றியதால் முதல் இரண்டு பெட்டிகள் முழுமையாக தடம் புரண்டதாக அதிகாரிகள் தெரிவித்தனர்.
சம்பவத்தின் உண்மையான காரணத்தை கண்டறிய, பிரசரானா (Prasarana) நிறுவனத்திலிருந்து சுயாதீனமாக செயல்படும் விசேட விசாரணைக் குழு அமைக்கப்பட்டுள்ளது. விமான விபத்து விசாரணைப் பிரிவு மற்றும் ரயில்வே பொறியியல் நிபுணர்கள் இணைந்து இந்த விசாரணையை மேற்கொள்ளவுள்ளனர்.
மனிதப் பிழை, தொழில்நுட்ப கோளாறு அல்லது அமைப்பு செயலிழப்பு போன்ற காரணிகள் சம்பவத்திற்கு வழிவகுத்ததா என்பது குறித்து முழுமையான ஆய்வு நடத்தப்படும் என அமைச்சர் தெரிவித்தார். விசாரணை அறிக்கை 30 நாட்களுக்குள் தயாரித்து அமைச்சரவைக்கு சமர்ப்பிக்கப்படும் என்றும், பின்னர் பொதுமக்களுக்கும் வெளியிடப்படும் என்றும் கூறினார்.
தற்போது அம்பாங் மற்றும் ஸ்ரீ பெட்டாலிங் வழித்தடங்களில் உள்ள அனைத்து நிலையங்களும் செயல்பாட்டில் உள்ளன. எனினும் மாற்றியமைக்கப்பட்ட சேவை அட்டவணையின் கீழ் பயணிகள் குறிப்பிட்ட நிலையங்களில் ரயில் மாற்றம் செய்ய வேண்டிய நிலை ஏற்பட்டுள்ளது. ரயில்களின் வருகை இடைவெளி ஆறு முதல் எட்டு நிமிடங்களாக அதிகரிக்கப்பட்டுள்ளது.
வியாழக்கிழமை காலை இடம்பெற்ற இந்த சம்பவத்தில், LRT ரயில் ஒன்று தண்டவாள மாற்று அமைப்பில் ஏற்பட்ட கோளாறால் தடம் புரண்டது. சம்பவத்தில் சிக்கிய 25 பயணிகளும் பாதுகாப்பாக வெளியேற்றப்பட்டதுடன் எவருக்கும் காயம் ஏற்படவில்லை என அதிகாரிகள் உறுதிப்படுத்தியுள்ளனர்.
