25 மே 2026 : உக்ரைன் தலைநகர் கீவ் மற்றும் அதன் சுற்றுப்பகுதிகள் மீது ரஷியா நடத்திய மிகப்பெரிய வான்வழித் தாக்குதலில் குறைந்தது 4 பேர் உயிரிழந்ததுடன், 80-க்கும் மேற்பட்டோர் காயமடைந்துள்ளனர்.
இந்த தாக்குதலில் ரஷியா, “ஒரேஷ்னிக்” எனப்படும் அதிநவீன ஹைப்பர்சோனிக் ஏவுகணையையும் பயன்படுத்தியுள்ளதாக தகவல் வெளியாகியுள்ளது. இந்த ஏவுகணை ஒலியின் வேகத்தை விட பல மடங்கு வேகத்தில் பயணிக்கும் திறன் கொண்டதாக கூறப்படுகிறது.
உக்ரைன் அதிகாரிகள் வெளியிட்ட தகவலின்படி, ஒரே இரவில் சுமார் 600 டிரோன்கள் மற்றும் 90 ஏவுகணைகள் ஏவப்பட்டதாக தெரிவிக்கப்பட்டுள்ளது. இந்த தாக்குதலில் கீவ் நகரமே முக்கிய இலக்காக இருந்ததாக உக்ரைன் அதிபர் விளாடிமிர் செலன்ஸ்கி தெரிவித்துள்ளார்.
தாக்குதலால் பல குடியிருப்பு கட்டிடங்கள், பள்ளிகள், சந்தைகள் மற்றும் நீர்வழங்கல் வசதிகள் சேதமடைந்துள்ளன. கீவின் பல பகுதிகளில் தீ விபத்துகளும் ஏற்பட்டதாக அதிகாரிகள் தெரிவித்துள்ளனர்.
இந்த தாக்குதல், ரஷியா – உக்ரைன் போரில் கடந்த நான்கு ஆண்டுகளில் நடைபெற்ற மிகக் கடுமையான தாக்குதல்களில் ஒன்றாகக் கருதப்படுகிறது. மேலும், ரஷியா இந்த “ஒரேஷ்னிக்” ஏவுகணையை பயன்படுத்துவது இது மூன்றாவது முறை எனவும் தகவல் வெளியாகியுள்ளது.
இதற்கிடையில், இந்த தாக்குதலுக்கு பல ஐரோப்பிய நாடுகள் கடும் கண்டனம் தெரிவித்துள்ளன. பொதுமக்கள் வாழும் பகுதிகள் குறிவைக்கப்பட்டதாக உக்ரைன் குற்றஞ்சாட்டியுள்ள நிலையில், ரஷியா தனது தாக்குதல்கள் ராணுவ இலக்குகளை மட்டுமே குறிவைத்ததாக தெரிவித்துள்ளது.
