கோலாலம்பூர், 22 மே 2026 : UNITAR சர்வதேசப் பல்கலைக்கழகம் மற்றும் மலேசிய திரைப்பட இயக்குநர் திரு. கார்த்திக் ஷாமலன் இணைந்து தயாரித்துள்ள தமிழ் மொழி யூடியூப் தொடரான “3 சொல்லு மட்டும்தா (3SM)” அதிகாரப்பூர்வமாக வெளியீடு செய்ப்பட்டது.
இந்த நிகழ்வில் தேசிய ஒற்றுமைத் துணை அமைச்சர் திரு. யுனேஸ்வரன் ராமராஜ் கலந்து கொண்டு, தொடரை வெளியீடு செய்தார்.
நிகழ்வில் உரையாற்றிய அவர், இன்றைய டிஜிட்டல் மற்றும் படைப்பாற்றல் உலகில் தரமான உள்ளடக்கங்களை உருவாக்குவதற்கு விலையுயர்ந்த உபகரணங்கள் அவசியமில்லை என்று தெரிவித்தார். ஒரு ஸ்மார்ட்போன், வலுவான யோசனை, சரியான வழிகாட்டுதல் மற்றும் உழைப்பதற்கான தைரியம் இருந்தால் இளைஞர்களால் சமூகத்தில் தாக்கத்தை ஏற்படுத்தக்கூடிய படைப்புகளை உருவாக்க முடியும் என்றார்.
மேலும், டிஜிட்டல் யுகத்தில் திறமை என்பது நாட்டின் முக்கிய சொத்தாக கருதப்பட வேண்டும் என்றும், இளைஞர்கள் தங்களது சொந்தக் கதைகளை சொல்லும் வாய்ப்புகளை அதிகரிக்க வேண்டும் என்றும் அவர் வலியுறுத்தினார்.
உள்ளூர் தமிழ் திரைப்பட மற்றும் படைப்பாற்றல் துறையில் குறிப்பிடத்தக்க பங்களிப்பை வழங்கி வரும் இயக்குநர் கார்த்திக் ஷாமலனின் பங்களிப்பையும் அவர் பாராட்டினார். மாணவர்கள் மற்றும் புதிய திறமையாளர்கள் தொழில்துறை அனுபவங்களை நேரடியாகக் கற்றுக்கொள்வதற்கு இது ஒரு சிறந்த வாய்ப்பாக அமைந்துள்ளதாகவும் கூறினார்.
படைப்பாற்றல் மிக்க கதைசொல்லல், சமூக புரிதல், பச்சாதாபம் மற்றும் பகிரப்பட்ட அடையாளத்தை உருவாக்குவதில் முக்கிய பங்காற்றுகிறது என்றும், மலேசிய சமூகத்தின் பன்முகத்தன்மையை மனிதாபிமான அணுகுமுறையுடன் உலகிற்கு கொண்டு செல்ல இது உதவும் என்றும் அவர் குறிப்பிட்டார்.
மேலும், திரைப்படம், டிஜிட்டல் உள்ளடக்கம் மற்றும் படைப்புசார் கதைசொல்லல் துறைகளில் இளைஞர்களுக்கான வாய்ப்புகளை உருவாக்கும் முயற்சிக்காக UNITAR சர்வதேசப் பல்கலைக்கழகத்திற்கும் அதன் ஊடகம், கலை மற்றும் வடிவமைப்புத் துறைக்கும் அவர் வாழ்த்துகளைத் தெரிவித்தார்.
