கோலாலம்பூர், 01 மே 2026 : நாட்டின் முன்னேற்றம் என்பது வெறும் புள்ளிவிவரங்களால் மட்டுமல்லாது, ஒவ்வொரு தொழிலாளரும் நியாயமாகவும் மரியாதையுடனும் நலமுடனும் வாழ்கிறார்களா என்பதைக் கொண்டு அளவிடப்பட வேண்டும் என்று மனிதவள அமைச்சர் டத்தோ’ ஸ்ரீ ரமணன் ராமகிருஷ்ணன் தெரிவித்துள்ளார்.
2026 தொழிலாளர் தினத்தை முன்னிட்டு நடைபெற்ற நிகழ்வில் உரையாற்றிய அவர், தொழிலாளர்களின் பங்களிப்பே நாட்டின் வளர்ச்சியின் அடித்தளம் என்றும், அவர்களின் நலனைக் காக்கும் பொறுப்பு அரசுக்கும் சமூகத்திற்கும் உள்ளதாகவும் வலியுறுத்தினார்.
“நாட்டின் வளர்ச்சி என்பது எண்களில் மட்டுமல்ல; ஒவ்வொரு தொழிலாளரும் தங்கள் உழைப்பின் பலனை நியாயமாக அனுபவிப்பதில்தான் அது பிரதிபலிக்கிறது,” என்று அவர் குறிப்பிட்டார்.
நியாயம், மரியாதை மற்றும் நலனுடன் கூடிய சமூகத்தை உருவாக்குவதில் தொழிலாளர்களின் பங்கு முக்கியமானது என்பதால், அவர்களின் உழைப்பையும் அர்ப்பணிப்பையும் மதித்து கௌரவிக்க வேண்டும் எனவும் அவர் அழைப்பு விடுத்தார்.
கோலாலம்பூரில் உள்ள யூனிட்டி அரங்கில் நடைபெற்ற இந்த நிகழ்வு, தொழிலாளர்களின் உரிமைகள் மற்றும் நலன்களை முன்னிறுத்தும் முக்கியமான தளமாக அமைந்தது. “அனைத்து தொழிலாளர்களும் இணைந்து ஒரு சமநிலையுடனும் வளமானதுமான நாட்டை உருவாக்குகின்றனர்,” என்ற செய்தியுடன் தொழிலாளர் தினம் 2026 கொண்டாடப்பட்டது.
