குவைத், 05 ஏப்ரல் 2026 : அமெரிக்கா மற்றும் இஸ்ரேல் நாடுகள், ஈரானுடன் தொடர்ந்து மோதலில் ஈடுபட்டு வருகின்றன. மத்திய கிழக்கில் உள்ள அமெரிக்க ராணுவ தளங்களை குறிவைத்து கடந்த பிப்ரவரி 28ஆம் தேதி தொடங்கிய வான்வழி தாக்குதல்கள் இடையறாது நீடித்து வருகின்றன.
இதற்கு பதிலடியாக, ஈரான் தனது தாக்குதல்களை தளர்த்தாமல் தொடர்கிறது. முதலில் விமான நிலையங்களை குறிவைத்த தாக்குதல்களுக்கு பின், கப்பல் துறைமுகங்கள் மற்றும் எண்ணெய் வளங்கள் நிறைந்த பகுதிகளையும் தீவிரமாக குறிவைத்து தாக்கி வருகிறது. வளைகுடா நாடுகள், குறிப்பாக அமீரகம் உள்ளிட்ட நாடுகள், இந்த தாக்குதல்களை எதிர்த்து இடைமறிப்பு நடவடிக்கைகளை தொடர்ந்து மேற்கொண்டு வருகின்றன.
இந்த நிலையில், குவைத் நாட்டில் பல அமைச்சக அலுவலகங்கள் அமைந்துள்ள அரசு வளாகத்தை இலக்காகக் கொண்டு ஈரான் டிரோன் தாக்குதல் நடத்தியுள்ளது. இந்த தாக்குதலில் கணிசமான பொருள் சேதம் ஏற்பட்டதாக குவைத் அரசு தெரிவித்துள்ளது.
எனினும், இந்த தாக்குதலில் உயிரிழப்போ, காயங்களோ எதுவும் ஏற்படவில்லை. முன்னெச்சரிக்கை நடவடிக்கையாக, அந்த வளாகத்தில் பணியாற்றும் ஊழியர்கள் தற்காலிகமாக வீட்டிலிருந்து பணியாற்றுமாறு உத்தரவிடப்பட்டுள்ளது.
