டெஹ்ரான், 12 மார்ச் 2026 : அமெரிக்கா மற்றும் இஸ்ரேலுடன் நடைபெற்று வரும் போரை முடிவுக்கு கொண்டுவர மூன்று முக்கிய நிபந்தனைகளை ஈரான் முன்வைத்துள்ளது.
இதுகுறித்து ஈரான் அதிபர் மசூத் பெசஷ்கியான் வெளியிட்டுள்ள அறிக்கையில், நாட்டின் பாதுகாப்பும் உரிமைகளும் உறுதிப்படுத்தப்படும் பட்சத்தில் மட்டுமே போருக்கு முடிவு கட்ட முடியும் என்று தெரிவித்துள்ளார்.
முதல் நிபந்தனையாக, ஈரானின் சட்டபூர்வமான உரிமைகளை அமெரிக்காவும் இஸ்ரேலும் அங்கீகரிக்க வேண்டும் என்று அவர் வலியுறுத்தினார். இரண்டாவது நிபந்தனையாக, போர் தாக்குதல்களால் ஈரானுக்கு ஏற்பட்ட சேதங்களுக்கு உரிய இழப்பீடு வழங்கப்பட வேண்டும் என்றும் கூறினார். மூன்றாவது நிபந்தனையாக, எதிர்காலத்தில் ஈரான் மீது மீண்டும் எந்தவித தாக்குதலும் நடைபெறாத வகையில் உறுதியான சர்வதேச உத்தரவாதம் வழங்கப்பட வேண்டும் என்றும் தெரிவித்தார்.
அமெரிக்காவும் இஸ்ரேலும் இணைந்து கடந்த பிப்ரவரி 28 ஆம் தேதி முதல் ஈரானின் பல பகுதிகளை இலக்காகக் கொண்டு வான்வழித் தாக்குதல்கள் நடத்தி வருகின்றன. இதற்கு பதிலடியாக ஈரானும் ஏவுகணை மற்றும் ட்ரோன் தாக்குதல்களை மேற்கொண்டு வருவதால் மேற்கு ஆசியப் பகுதியில் பதற்றம் தொடர்ந்து அதிகரித்து வருகிறது.
இந்த நிலையில், அமைதிக்கான தீர்வை கண்டுபிடிக்க பல்வேறு நாடுகளுடன் ஈரான் ஆலோசனை நடத்தி வருவதாகவும், தனது நிலைப்பாட்டை சர்வதேச தலைவர்களிடம் தெளிவுபடுத்தி வருவதாகவும் தகவல்கள் தெரிவிக்கின்றன.
இருப்பினும், ஈரான் முன்வைத்துள்ள இந்த மூன்று நிபந்தனைகள் குறித்து அமெரிக்கா மற்றும் இஸ்ரேல் இதுவரை அதிகாரப்பூர்வமான பதில் வெளியிடவில்லை என்பது குறிப்பிடத்தக்கது.
