மலாக்கா, 11 நவம்பர் 2026 : மலாக்கா மாநிலத்தின் காடெக் பகுதியில் இன்று பிற்பகல் பெய்த கனமழையால் திடீர் வெள்ளம் ஏற்பட்டதைத் தொடர்ந்து, பாதிக்கப்பட்ட மக்களுக்கு உதவுவதற்காக தேசிய முன்னணி வேட்பாளர் நடராஜா செல்லப்பா தனது குழுவினருடன் உடனடியாகக் களமிறங்கினார்.
பிற்பகல் 3.45 மணியளவில் கனமழை மற்றும் திடீர் வெள்ளம் குறித்த தகவல் கிடைத்ததும், அவர் தனது குழுவினருடன் பாதிக்கப்பட்ட பகுதிகளுக்குச் சென்று நிலைமையை நேரில் பார்வையிட்டதுடன், மக்களுக்குத் தேவையான உதவிகளையும் வழங்கினார்.
வெள்ளத்தால் பாதிக்கப்பட்ட வீடுகளில் இருந்த பொருள்களைப் பாதுகாப்பான இடங்களுக்கு மாற்றுவதற்கும், முதியவர்கள் மற்றும் குழந்தைகளின் பாதுகாப்பை உறுதிப்படுத்துவதற்கும் அவரது குழுவினர் உதவினர். மேலும், உடனடி நடவடிக்கை எடுக்க வேண்டிய தகவல்கள் சம்பந்தப்பட்ட அதிகாரிகளிடம் தெரிவிக்கப்பட்டன.
பாதிக்கப்பட்ட ஒவ்வொரு குடும்பத்தின் பாதுகாப்புமே தற்போதைய முக்கிய முன்னுரிமை எனக் குறிப்பிட்ட நடராஜா செல்லப்பா, பாதுகாப்புப் படையினர், அரசு அமைப்புகள், தன்னார்வலர்கள் மற்றும் உள்ளூர் மக்கள் இணைந்து மேற்கொண்டு வரும் உதவிப் பணிகளுக்கு நன்றி தெரிவித்தார்.
நிலைமையைத் தொடர்ந்து கண்காணித்து, உதவி தேவைப்படுவோருக்கான நிவாரணப் பணிகளை ஒருங்கிணைக்கத் தொடர்ந்து களத்தில் இருப்பேன் என்றும் அவர் உறுதியளித்தார். வெள்ளத்தால் பாதிக்கப்பட்டவர்கள் அல்லது உதவி தேவைப்படுவோர், தனது குழுவினரையோ அருகிலுள்ள செயல்பாட்டு மையத்தையோ உடனடியாகத் தொடர்புகொள்ளுமாறு நடராஜா செல்லப்பா கேட்டுக்கொண்டார்.
மலாக்கா காடெக் மக்களின் பாதுகாப்பே முதன்மையானது என்றும், துயரமான நேரங்களில் அனைவரும் ஒன்றிணைந்து ஒருவருக்கொருவர் உதவ வேண்டும் என்றும் அவர் வலியுறுத்தினார்.
