கோலாலம்பூர், 05 நவம்பர் 2026 : 2026–2027ஆம் ஆண்டுக்கான மலேசிய எஃப்.ஏ. கோப்பை கால்பந்துப் போட்டியின் இறுதி ஆட்டம், அடுத்த ஆண்டு ஜனவரி 16ஆம் தேதி இஸ்கந்தர் புத்ரியில் உள்ள சுல்தான் இப்ராஹிம் விளையாட்டரங்கில் நடைபெறவுள்ளது. மலேசிய கால்பந்து லீக் (MFL) நிர்வாகக் குழுவின் 2025–2029 தவணைக்கான மூன்றாவது கூட்டத்தில், கடந்த நவம்பர் 3ஆம் தேதி இதற்கான முடிவு எடுக்கப்பட்டதாக அறிவிக்கப்பட்டுள்ளது.
2027ஆம் ஆண்டு நடைபெறவுள்ள தென்கிழக்காசிய விளையாட்டுப் போட்டிகளுக்கான முன்னேற்பாடாக, புக்கிட் ஜாலில் தேசிய விளையாட்டரங்கில் ஆடுகளம், ஓடுதளம் மற்றும் இதர வசதிகளை மேம்படுத்தும் பணிகள் நடைபெற்று வருகின்றன. இப்பணிகள் 2027 மே மாதம் நிறைவடையும் என எதிர்பார்க்கப்படுவதால், அந்த அரங்கில் இறுதிப் போட்டியை நடத்த முடியாத நிலை ஏற்பட்டுள்ளது.
இதனைத் தொடர்ந்து, ஆடுகளத்தின் தரம், அணிகளுக்கான வசதிகள், போக்குவரத்து, பாதுகாப்பு, ரசிகர்களுக்கான அணுகல் மற்றும் நேரடி ஒளிபரப்பு உள்ளிட்ட அம்சங்களைக் கருத்தில் கொண்டு சுல்தான் இப்ராஹிம் விளையாட்டரங்கு தேர்வு செய்யப்பட்டுள்ளதாக MFL தெரிவித்துள்ளது.
35,109 பார்வையாளர்கள் அமரும் வசதியைக் கொண்டுள்ள இந்த அரங்கு, சர்வதேசத் தரத்திலான விளையாட்டு வசதிகளையும் பெற்றுள்ளது. இதற்கு முன்பு 2023ஆம் ஆண்டு எஃப்.ஏ. கோப்பை இறுதிப் போட்டியும் இதே அரங்கில் நடைபெற்றது. அப்போது ஜோகூர் டாருல் தாசிம் (JDT) அணி, கோலாலம்பூர் சிட்டி எஃப்.சி. அணியை 2–0 என்ற கோல் கணக்கில் வீழ்த்தி கோப்பையைக் கைப்பற்றியது.
2026–2027 பருவத்திற்கான எஃப்.ஏ. கோப்பைப் போட்டியில் தற்போது ஜோகூர் டாருல் தாசிம், டிபிஎம்எம் எஃப்.சி., சிலாங்கூர் எஃப்.சி. மற்றும் கூச்சிங் சிட்டி ஆகிய நான்கு அணிகள் அரையிறுதிச் சுற்றில் போட்டியிட்டு வருகின்றன. இறுதிப் போட்டிக்கான அரங்கத் தேர்வு, பங்கேற்கும் அணிகளுக்கும் கால்பந்து ரசிகர்களுக்கும் சிறந்த அனுபவத்தை வழங்கும் என மலேசிய கால்பந்து லீக் நம்பிக்கை தெரிவித்துள்ளது.
