கோலாலம்பூர், 04 நவம்பர் 2026 : மலேசியாவை 2030ஆம் ஆண்டுக்குள் செயற்கை நுண்ணறிவுத் துறையில் முன்னணி நாடாக உருவாக்கும் இலக்குடன், உள்கட்டமைப்பு முதலீடுகளைப் பொருளாதார வளர்ச்சியாகவும் புதிய வேலைவாய்ப்புகளாகவும் மாற்ற அரசு நடவடிக்கை எடுத்து வருவதாக டிஜிட்டல் அமைச்சர் கோபிந்த் சிங் தியோ தெரிவித்தார்.
கோலாலம்பூர் மலாயா பல்கலைக்கழகத்தில் இன்று நடைபெற்ற ‘மலேசியா செயற்கை நுண்ணறிவுடன் முன்னேற்றப் பாதையில்’ (Mantap Malaysia Bersama AI 2026) நிகழ்ச்சியில் உரையாற்றிய அவர், மலேசியாவின் டிஜிட்டல் எதிர்காலத்தில் கூகுள் நிறுவனம் மேற்கொண்டு வரும் முதலீடுகளையும் ஒத்துழைப்பையும் பாராட்டினார்.
தரவுக் கட்டமைப்பு மையங்கள், செயற்கை நுண்ணறிவுக் கணினி வசதிகள், குறைக்கடத்தி மற்றும் மின்னணுவியல் தொழில்கள் ஆகியவற்றில் மலேசியா வலுவான அடித்தளத்தைக் கொண்டுள்ளதாக அவர் குறிப்பிட்டார். இந்த முதலீடுகள் உள்ளூர் நிறுவனங்களின் வளர்ச்சி, தொழில்நுட்பத் திறன் மேம்பாடு மற்றும் உயர்தர வேலைவாய்ப்புகளை உருவாக்க உதவும் என்றார்.
மேலும், ‘AI@Work’ திட்டத்தின் கீழ் 4,45,000 அரசுப் பணியாளர்களுக்கு கூகுளின் செயற்கை நுண்ணறிவுக் கருவிகளைப் பயன்படுத்தும் வசதி வழங்கப்பட்டுள்ளதாகவும், ‘AI Untuk Rakyat’ திட்டத்தின் மூலம் இளைஞர்களுக்கு மூன்று மாத இலவச AI கருவிப் பயன்பாடு வழங்கப்படுவதாகவும் தெரிவித்தார்.
தேசிய செயற்கை நுண்ணறிவுச் செயல் திட்டம் 2026–2030இன் கீழ் முன்னெடுக்கப்படும் ‘AI Cities’ திட்டம் குறித்தும் அவர் விளக்கினார். போக்குவரத்து நெரிசல், வெள்ள மேலாண்மை, எரிசக்தி பயன்பாடு மற்றும் பொதுச் சேவைகளை மேம்படுத்த செயற்கை நுண்ணறிவுத் தீர்வுகளை உருவாக்குவது இத்திட்டத்தின் நோக்கமாகும்.
மலேசியா செயற்கை நுண்ணறிவைப் பயன்படுத்தும் நாடாக மட்டுமல்லாமல், புதிய AI தொழில்நுட்பங்கள், தயாரிப்புகள் மற்றும் சேவைகளை உருவாக்கும் நாடாகவும் வளர வேண்டும் என அவர் வலியுறுத்தினார்.
இந்நிகழ்ச்சியில் பிரதமர் டத்தோ ஸ்ரீ அன்வார் இப்ராஹிம், உயர்கல்வி அமைச்சர் டத்தோ ஸ்ரீ டாக்டர் ஜாம்ப்ரி அப்துல் காதிர், தகவல் தொடர்பு அமைச்சர் டத்தோ ஸ்ரீ அஹ்மட் ஃபஹ்மி முகமது ஃபட்சில், கூகுள் நிறுவனத்தின் தலைவர் ரூத் போராட் உள்ளிட்டோர் கலந்து கொண்டனர்.
