கோலாலம்பூர், 30 அக்டோபர் 2026 : 2027ஆம் ஆண்டுக்கான பட்ஜெட்டில் மனிதவள மேம்பாடு, உள்ளூர் மக்களுக்கான வேலைவாய்ப்புகள் மற்றும் தொழிலாளர்களின் நலன், பாதுகாப்பு ஆகியவற்றுக்கு முக்கியத்துவம் அளிக்கப்பட்டுள்ளதாக மனிதவள அமைச்சர் ராமணன் ராமகிருஷ்ணன் தெரிவித்துள்ளார்.
நாடாளுமன்றத்தில் 2027ஆம் ஆண்டுக்கான பட்ஜெட் மீதான விவாதத்தில் பங்கேற்று கருத்துகளையும் பரிந்துரைகளையும் முன்வைத்த 46 நாடாளுமன்ற உறுப்பினர்களுக்கு அவர் நன்றி தெரிவித்தார். நாட்டின் மனிதவள மேம்பாட்டையும் தொழிலாளர்களின் பாதுகாப்பையும் வலுப்படுத்துவதற்கான அவர்களின் பங்களிப்பைப் பாராட்டினார்.
பிரதமர் டத்தோஸ்ரீ அன்வார் இப்ராஹிம் தலைமையிலான மடானி அரசாங்கம், மனிதவள மேம்பாட்டுக்கு முக்கியத்துவம் அளித்து பட்ஜெட்டில் நிதி ஒதுக்கியிருப்பதாக ராமணன் குறிப்பிட்டார்.
குறிப்பாக, தொழில்நுட்ப மற்றும் தொழிற்கல்வி, பயிற்சி (TVET) திட்டங்களை வலுப்படுத்துதல், வேலைவாய்ப்புகளை விரிவுபடுத்துதல், இணையவழி மற்றும் தற்காலிகப் பணியாளர்களின் நலன் மற்றும் பாதுகாப்பை உறுதிப்படுத்துதல் உள்ளிட்ட நோக்கங்களுக்காக மொத்தம் 8 பில்லியன் ரிங்கிட் ஒதுக்கப்பட்டுள்ளது.
இந்தியச் சமூகத்தின் கல்வி, திறன் மேம்பாடு மற்றும் பொருளாதார முன்னேற்றத்தை வலுப்படுத்தும் வகையில், மலேசிய இந்தியச் சமூக உருமாற்றப் பிரிவான மித்ராவுக்கான (MITRA) நிதி ஒதுக்கீடு 150 மில்லியன் ரிங்கிட்டாக உயர்த்தப்பட்டுள்ளதையும் ராமணன் சுட்டிக்காட்டினார். இந்த நிதி ஒதுக்கீடு, குறிப்பாக இளம் தலைமுறையினருக்குக் கூடுதல் திறன் பயிற்சிகளை வழங்கவும், அதிக வருமானம் ஈட்டக்கூடிய வேலைவாய்ப்புகளை உருவாக்கவும் உதவும் என எதிர்பார்க்கப்படுகிறது.
பட்ஜெட்டில் அறிவிக்கப்படும் ஒவ்வொரு நிதி ஒதுக்கீடும் வெறும் புள்ளிவிவரமாக இருக்கக் கூடாது என்று வலியுறுத்திய ராமணன், அவை மக்களுக்கான உண்மையான வேலைவாய்ப்புகளாகவும், வருமான உயர்வாகவும், தொழிலாளர் பாதுகாப்புக்கான உத்தரவாதங்களாகவும் மாற வேண்டும் என்றார். மேலும், 2027ஆம் ஆண்டுக்கான பட்ஜெட் திட்டங்களைத் தயாரிப்பதிலும் கொள்கைகளை ஒருங்கிணைப்பதிலும் பங்களித்த மனிதவள அமைச்சகத்தின் (KESUMA) அதிகாரிகள், துறைகள் மற்றும் முகமைகளுக்கும் அவர் நன்றி தெரிவித்தார்.
பட்ஜெட் அறிவிப்புடன் அரசின் பொறுப்பு முடிவடைவதில்லை என்றும், அறிவிக்கப்பட்ட திட்டங்கள் முறையாகச் செயல்படுத்தப்பட்டு அவற்றின் பலன்கள் மக்களைச் சென்றடைவதை உறுதிசெய்வதே உண்மையான பொறுப்பு என்றும் ராமணன் ராமகிருஷ்ணன் தெரிவித்தார்.
