பினாங்கு, 29 அக்டோபர் 2026 : பினாங்கு மாநிலம், பயா தெருபோங் பகுதியில் உள்ள தாமான் ஸ்ரீ ரம்பாயில் ஏற்பட்ட உயிரிழப்புகளை ஏற்படுத்திய நிலச்சரிவு தொடர்பாக, மலைச்சரிவு மேம்பாட்டுத் திட்டத்தின் ஒப்புதல் ஆவணங்கள் மற்றும் பாதுகாப்பு ஆய்வு அறிக்கைகளை மாநில அரசும் பினாங்கு தீவு மாநகராட்சியும் (எம்பிபிபி) வெளியிட வேண்டும் என ஜெராக்கான் கட்சியின் பினாங்கு மாநில மகளிர் பிரிவுத் துணைத் தலைவர் ஹெங் சீ லின் வலியுறுத்தியுள்ளார்.
மலைச்சரிவு மேம்பாட்டுத் திட்டங்கள் பாதுகாப்பு விதிமுறைகளின்படி செயல்படுத்தப்படுவதாக மாநில அரசு கூறினாலும், பாதிக்கப்பட்ட வீடுகளுக்கும் மலைச்சரிவுத் தடுப்புக் கட்டமைப்புகளுக்கும் இடையிலான குறுகிய இடைவெளி பல கேள்விகளை எழுப்புவதாக அவர் தெரிவித்தார்.
2020ஆம் ஆண்டின் பினாங்கு மலைப்பகுதி மேம்பாட்டுப் பாதுகாப்பு வழிகாட்டுதலின்படி, நிலைத்தன்மையற்ற சரிவுகளுக்கு அருகில் உரிய பாதுகாப்பு இடையகப் பகுதி அமைக்கப்பட வேண்டும். அதன் அகலம் குறைந்தபட்சம் சரிவின் உயரத்துக்கு இணையாக இருக்க வேண்டும் என்றும் அவர் சுட்டிக்காட்டினார்.
சரிவின் உயரம், சாய்வு, பாதுகாப்பு இடைவெளி, கட்டுமான அனுமதிகள் மற்றும் புவித்தொழில்நுட்ப ஆய்வு அறிக்கைகள் குறித்த முழுமையான விவரங்களை அதிகாரிகள் வெளியிட வேண்டும் என அவர் கேட்டுக்கொண்டார்.
மேலும், கடந்த செப்டம்பரில் மேம்பாட்டாளர் மற்றும் ஒப்பந்ததாரருக்கு வழங்கப்பட்ட எச்சரிக்கைகள், மேற்கொள்ளப்பட்ட திருத்த நடவடிக்கைகள், மாநகராட்சியின் மறுஆய்வு அறிக்கைகள், 2015ஆம் ஆண்டு முதல் வழங்கப்பட்ட திட்ட அனுமதிகள் மற்றும் குடியிருப்பாளர்களின் புகார்கள் தொடர்பான பதிவுகளையும் வெளியிட வேண்டும் என அவர் வலியுறுத்தினார்.
மலைச்சரிவு பாதுகாப்பு விதிமுறைகள் முறையாகச் செயல்படுத்தப்பட்டனவா என்ற கேள்விகளுக்கு இன்னும் தெளிவான பதில் கிடைக்காத நிலையில், 76 மீட்டருக்கும் அதிகமான உயரமுள்ள பகுதிகளில் மேம்பாட்டுக் கட்டுப்பாடுகளைத் தளர்த்துவது குறித்து மாநில அரசு மறுபரிசீலனை செய்வதற்கும் அவர் எதிர்ப்புத் தெரிவித்தார்.
தற்போதைய பினாங்கு மாநிலக் கட்டமைப்புத் திட்டம் 2030இல் 76 மீட்டர் அல்லது அதற்கு மேற்பட்ட உயரமுள்ள பகுதிகளிலும், 25 பாகை அல்லது அதற்கு மேற்பட்ட சாய்வுள்ள நிலங்களிலும் மேம்பாட்டுக் கட்டுப்பாடுகள் உள்ளன. இக்கட்டுப்பாட்டை 2040ஆம் ஆண்டுக்கான புதிய திட்டத்திலும் தக்கவைக்க வேண்டும் என அவர் வலியுறுத்தினார்.
