பெட்டாலிங் ஜெயா, 21 அக்டோபர் 2026 : மலேசியாவின் தொழில்துறை வளர்ச்சியை விரைவுபடுத்துவதில் AI மற்றும் டிஜிட்டல் தொழில்நுட்பங்கள் முக்கியப் பங்கு வகிக்கும் என்று டிஜிட்டல் அமைச்சர் கோபிந்த் சிங் டியோ தெரிவித்துள்ளார். DASSAULT SYSTÈMES நிறுவனத்தின் மலேசிய அலுவலகத் திறப்பு விழாவில் உரையாற்றிய அவர், மலேசியாவின் சிறு மற்றும் நடுத்தர நிறுவனங்கள் மேம்பட்ட தொழில்நுட்பங்களைப் பயன்படுத்துவதற்கு நிறுவனம் ஆதரவளிக்க வேண்டும் என்றும் வலியுறுத்தினார்.
டிஜிட்டல் தொழில்நுட்பம் என்பது கைப்பேசி செயலிகள் மற்றும் இணையச் சேவைகளுடன் மட்டும் நின்றுவிடுவதில்லை என்று குறிப்பிட்ட அவர், தொழிற்சாலைகள், வாகன உற்பத்தி, குறைக்கடத்திகள் மற்றும் தரவு மையங்களில் பயன்படுத்தப்படும் தொழில்நுட்பங்கள் நாட்டின் எதிர்காலப் பொருளாதார வளர்ச்சிக்கு முக்கியமானவை என்றார்.
தொழில்துறை டிஜிட்டல் மயமாக்கலில் 40 ஆண்டுகளுக்கும் மேலான அனுபவம் கொண்ட DASSAULT SYSTÈMES, ஒரு யோசனையை நடைமுறைப் பொருளாக மாற்றுவதற்கும், செயற்கை நுண்ணறிவைத் துல்லியமான டிஜிட்டல் மாதிரிகளுடன் இணைப்பதற்கும் உதவும் தொழில்நுட்பத் தளங்களை வழங்குவதாக அவர் தெரிவித்தார்.
மலேசியா தனது தேசிய குறைக்கடத்தி உத்தியைச் செயல்படுத்தி வரும் நிலையில், ஒருங்கிணைந்த சுற்று வடிவமைப்பு (IC Design), மேம்பட்ட பேக்கேஜிங் மற்றும் உற்பத்தி உபகரணங்கள் போன்ற துறைகளில் வளர்ச்சியை அதிகரிப்பது முக்கியம் என்றார். மேலும், 2030ஆம் ஆண்டுக்கான புதிய தொழில்துறை பெருந்திட்டத்தின் நோக்கங்களுக்கு ஏற்ப, தொழிற்சாலைகள் அதிக உற்பத்தித் திறன் கொண்டதாகவும், நவீனமாகவும், சுற்றுச்சூழலுக்கு உகந்ததாகவும் மாற வேண்டும் எனக் குறிப்பிட்டார்.
‘விர்ச்சுவல் ட்வின்’ (Virtual Twin) தொழில்நுட்பத்தின் மூலம், தொழிற்சாலைகளின் உற்பத்தி அமைப்புகளை டிஜிட்டல் முறையில் முன்கூட்டியே சோதித்து மேம்படுத்த முடியும். இதனால், உண்மையான உற்பத்திப் பணிகளில் மாற்றங்களைச் செய்வதற்கு முன்பே குறைபாடுகளைக் கண்டறிந்து செயல்திறனை உயர்த்த முடியும் என்றும் அவர் விளக்கினார்.
விமானப் பராமரிப்பு, பழுதுபார்ப்பு மற்றும் மறுசீரமைப்பு, மின்சார வாகன உற்பத்தி, வாகன மென்பொருள் மற்றும் தரவு மையங்கள் ஆகிய துறைகளிலும் டிஜிட்டல் தொழில்நுட்பங்களுக்கு அதிக வாய்ப்புகள் இருப்பதாக அமைச்சர் தெரிவித்தார். மலேசியாவில் உருவாக்கப்படும் தரவு மையங்களின் திறன், உள்ளூர் தொழிற்சாலைகள் மற்றும் மலேசிய நிறுவனங்களின் வடிவமைப்புப் பணிகளுக்கும் பயன்பட வேண்டும் என்றும் வலியுறுத்தினார்.
AI தொழில்நுட்பத்தைப் பொறுப்புடன் பயன்படுத்துவதற்கான நிர்வாகக் கட்டமைப்புகள், திறன் மேம்பாட்டுத் திட்டங்கள் மற்றும் துறைசார் வழிகாட்டுதல்களை AI Malaysia Berhad மூலம் உருவாக்கி வருவதாக கோபிந்த் சிங் டியோ கூறினார். அதேவேளை, மலேசிய டிஜிட்டல் பொருளாதாரக் கழகம் (MDEC) மூலம் தரவு, இணைய இணைப்பு மற்றும் இணையப் பாதுகாப்பு போன்ற அடித்தளங்களும் வலுப்படுத்தப்பட்டு வருகின்றன என்றார்.
DASSAULT SYSTÈMES நிறுவனம் மலேசியாவின் சிறு மற்றும் நடுத்தர நிறுவனங்களுக்கு மலிவான தொழில்நுட்பத் தீர்வுகளையும் நேரடிப் பயிற்சிகளையும் வழங்க வேண்டும் என்று அவர் கேட்டுக்கொண்டார். இதற்கான அளவிடக்கூடிய இலக்குகளை நிறுவனம் நிர்ணயிக்க வேண்டும் என்றும், டிஜிட்டல் அமைச்சும் MDEC-உம் இந்த முயற்சிகளுக்கு ஆதரவளிக்கும் என்றும் தெரிவித்தார்.
தொழில்நுட்ப ஆராய்ச்சி மற்றும் திட்டமிட்ட முதலீடுகள் மூலம் பிரான்ஸ் வலுவான தொழில்துறைத் தொழில்நுட்பச் சூழலை உருவாக்கியுள்ளதைச் சுட்டிக்காட்டிய அவர், மலேசியாவும் சர்வதேச நிறுவனங்களுடனான கூட்டாண்மைகள் மூலம் AI துறையில் முன்னேறி, தனது டிஜிட்டல் பொருளாதாரத்தை மேலும் விரிவுபடுத்த முடியும் என நம்பிக்கை தெரிவித்தார்.
நிகழ்வில் மலேசியாவுக்கான பிரான்ஸ் தூதர் Marc Abensour, DASSAULT SYSTÈMES நிறுவனத்தின் ஆசிய-பசிபிக் பிராந்தியத் துணைத் தலைவர் Samson Khaou மற்றும் அரசாங்க அமைப்புகளின் பிரதிநிதிகள் கலந்துகொண்டனர். விழாவில் நிறுவனத்தின் மலேசிய அலுவலகத்தை அமைச்சர் அதிகாரப்பூர்வமாகத் திறந்து வைத்தார்.
