கோலாலம்பூர், 17 அக்டோபர் 2026 : மலேசியாவின் டிஜிட்டல் பொருளாதார வளர்ச்சியை அடுத்த கட்டத்துக்குக் கொண்டு செல்லும் நோக்கில், முதலீடுகள், திறமையான மனிதவளம் மற்றும் தொழில்நுட்பப் புதுமைகளை மையமாகக் கொண்டு அந்நாட்டின் விளையாட்டு உருவாக்கத் துறை புதிய வளர்ச்சிக் கட்டத்தில் நுழைந்துள்ளது. இதன் ஒரு பகுதியாக, மலேசிய டிஜிட்டல் பொருளாதாரக் கழகமான MDEC சார்பில் ஏற்பாடு செய்யப்பட்ட LEVEL UP KL 2026 நிகழ்ச்சி, உலகம் முழுவதிலுமிருந்து விளையாட்டு உருவாக்குநர்கள், வெளியீட்டாளர்கள், முதலீட்டாளர்கள் மற்றும் தொழில்நுட்ப வல்லுநர்களை ஒன்றிணைத்தது.
இந்நிகழ்ச்சியின் ஒரு பகுதியாக, அக்டோபர் 15ஆம் தேதி நடைபெற்ற SEA Game Awards 2026 விருது விழா, தென்கிழக்காசியாவின் விளையாட்டு உருவாக்கத் திறன்கள், படைப்பாற்றல் மற்றும் தொழில்நுட்பப் புதுமைகளை அங்கீகரித்தது. MDEC தலைவர் கணேஷ் குமார் பங்கா (Ganesh Kumar Bangah) தலைமையில் நடைபெற்ற இந்நிகழ்வில், பல்வேறு பிரிவுகளில் சிறந்த விளையாட்டுகள் மற்றும் அவற்றை உருவாக்கிய குழுக்களுக்கு விருதுகள் வழங்கப்பட்டன.
இந்த ஆண்டு விருது விழாவில், மலேசியாவின் Metronomik நிறுவனத்தால் உருவாக்கப்பட்ட Ondeh Ondeh Kaya’s Tasty Tale விளையாட்டு முக்கிய வெற்றியாளராகத் திகழ்ந்தது. இவ்விளையாட்டு மதிப்புமிக்க Grand Jury Award, சிறந்த தொழில்நுட்பம் (Best Technology), சிறந்த இசை மற்றும் பின்னணி இசை (Best Score & Music) ஆகிய மூன்று விருதுகளை வென்றது. அதேவேளையில், Kidbash: Super Legend சிறந்த காட்சிக் கலைக்கான விருதையும், Mission Mancala சிறந்த ஒலிக்கான விருதையும், TCG Card Shop Simulator சிறந்த விளையாட்டு வடிவமைப்புக்கான விருதையும் பெற்றன.
மேலும், Compensation Not Guaranteed சிறந்த கதைசொல்லலுக்கான விருதையும், Fish Can Man சிறந்த மாணவர் விளையாட்டுக்கான விருதையும் வென்றன. பார்வையாளர்களின் விருப்பத் தேர்வு விருதை Little Tree Kingdom கைப்பற்றியது. சர்வதேச விளையாட்டுப் பிரிவில் HOMURA HIME வெற்றி பெற்றது. இவ்விருதுகள் தென்கிழக்காசியப் பிராந்தியத்தில் உருவாகிவரும் புதிய விளையாட்டுத் திறன்களையும் புதுமையான படைப்புகளையும் வெளிப்படுத்தின.
விருது விழாவின்போது, மலேசியா, பிலிப்பைன்ஸ், சிங்கப்பூர், தாய்லாந்து, இந்தோனேசியா உள்ளிட்ட நாடுகளைச் சேர்ந்த விளையாட்டு உருவாக்குநர்களின் புதிய படைப்புகளும் அறிமுகப்படுத்தப்பட்டன. மலேசியாவின் Albrite Studios உருவாக்கிய Project XII, Metronomik நிறுவனத்தின் Ondeh Ondeh Kaya’s Tasty Tale, Ten Ten Studioவின் Bloodwell, CtrlD Studioவின் Overhours மற்றும் RICRYM நிறுவனத்தின் Wira உள்ளிட்ட விளையாட்டுகளுக்கான முன்னோட்டக் காணொளிகளும் வெளியிடப்பட்டன.
மலேசியாவின் டிஜிட்டல் துறையின் வளர்ச்சி குறித்து கருத்துத் தெரிவித்த டிஜிட்டல் துணை அமைச்சர் டத்தோ வில்சன் உகாக் அனக் கும்போங் (Datuk Wilson Ugak anak Kumbong), அந்நாடு ஏற்கெனவே திறமையான உள்ளூர் விளையாட்டு உருவாக்குநர்கள் மற்றும் சர்வதேசத் துறைப் பங்கேற்பின் மூலம் வலுவான அடித்தளத்தை உருவாக்கியுள்ளதாகக் குறிப்பிட்டார். உயர்மதிப்புள்ள முதலீடுகளை ஈர்ப்பது, மலேசிய நிறுவனங்களுக்குச் சொந்தமான அறிவுசார் சொத்துகளை (Intellectual Property – IP) உருவாக்குவது மற்றும் சர்வதேசச் சந்தைகளில் போட்டியிடும் திறனை மேம்படுத்துவது ஆகியவை அடுத்தகட்ட முன்னுரிமைகளாக இருப்பதாக அவர் தெரிவித்தார்.
டிஜிட்டல் படைப்பாற்றல் துறைக்கான தேசியத் திட்டத்தின் கீழ், 2030ஆம் ஆண்டுக்குள் மலேசியா 9 பில்லியன் ரிங்கிட் வருவாய், 6 பில்லியன் ரிங்கிட் ஏற்றுமதி, 6 பில்லியன் ரிங்கிட் மூலோபாய முதலீடு மற்றும் 10,000 உயர்மதிப்புள்ள வேலைவாய்ப்புகளை உருவாக்க இலக்கு நிர்ணயித்துள்ளது. MDEC-இன் ஆரம்பகட்டத் தரவுகளின்படி, மலேசிய டிஜிட்டல் உள்ளடக்கச் சூழலில் சுமார் 300 நிறுவனங்கள் Malaysia Digital அந்தஸ்தைப் பெற்றுள்ளன. அவற்றில் சுமார் 100 நிறுவனங்கள் விளையாட்டு உருவாக்கத் துறையில் ஈடுபட்டுள்ளன.
இதற்கிடையில், செயற்கை நுண்ணறிவு (AI) தொழில்நுட்பம் மலேசிய விளையாட்டுத் துறையின் வளர்ச்சிக்கு முக்கிய வாய்ப்புகளை வழங்குவதாக MDEC தலைவர் கணேஷ் குமார் பங்கா தெரிவித்தார். AI தொழில்நுட்பத்தின் மூலம் உருவாக்கச் செலவுகளைக் குறைக்கவும், தயாரிப்பு செயல்முறைகளை விரைவுபடுத்தவும், பணித்திறனை அதிகரிக்கவும் முடியும் என்றாலும், சிறந்த விளையாட்டுகளை உருவாக்குவதற்கு மனிதப் படைப்பாற்றல், கற்பனைத்திறன் மற்றும் கதைசொல்லல் ஆகியவை தொடர்ந்து அவசியமானவை என அவர் வலியுறுத்தினார்.
விளையாட்டு உருவாக்குநர்களுக்குத் தேவையான உயர் திறன்களை வளர்ப்பதற்காக, LEVEL UP KL 2026 நிகழ்ச்சியில் தனிப்பட்ட திறன் மேம்பாட்டு மையமும் அமைக்கப்பட்டது. இதன் மூலம் தொழில்துறை நிபுணர்களின் வழிகாட்டுதல், படைப்புத் தொகுப்புகளுக்கான மதிப்பாய்வு மற்றும் தொழில் வழிகாட்டுதல் ஆகியவை வழங்கப்பட்டன.
சுமார் 12 ஆண்டுகளாக வளர்ந்து வரும் LEVEL UP KL நிகழ்ச்சி, தற்போது பிராந்திய அளவில் வணிக வாய்ப்புகள், சர்வதேச ஒத்துழைப்பு மற்றும் திறன் மேம்பாட்டுக்கான முக்கியத் தளமாக உருவெடுத்துள்ளது. இந்த ஆண்டு நிகழ்ச்சியில் 50-க்கும் மேற்பட்ட பேச்சாளர்கள், 25 மாநாட்டு அமர்வுகள், ஐந்து கூட்டாளர் நிகழ்வுகள் மற்றும் இரண்டு சிறப்புப் பயிற்சிப் பட்டறைகள் இடம்பெற்றன. மேலும், 400 வணிகச் சந்திப்புகள், 120 மில்லியன் ரிங்கிட் ஏற்றுமதி வாய்ப்புகள் மற்றும் 100 மில்லியன் ரிங்கிட் முதலீட்டு வாய்ப்புகளை உருவாக்குவதை இலக்காகக் கொண்டு நிகழ்ச்சி முன்னெடுக்கப்பட்டது.
மலேசியாவின் விளையாட்டு உருவாக்கத் துறையை வலுப்படுத்துவதுடன், தென்கிழக்காசிய நாடுகளின் படைப்பாளர்களுக்கு சர்வதேச அங்கீகாரம் மற்றும் புதிய வணிக வாய்ப்புகளை ஏற்படுத்தித் தருவதிலும் SEA Game Awards மற்றும் LEVEL UP KL 2026 முக்கியப் பங்காற்றியுள்ளன. தொழில்நுட்பம், முதலீடு மற்றும் மனிதத் திறன்களை ஒருங்கிணைப்பதன் மூலம் உலகளாவிய டிஜிட்டல் விளையாட்டுத் துறையில் மலேசியா தனது நிலையை மேலும் வலுப்படுத்த முயன்று வருகிறது.
