மலாக்கா, 12 அக்டோபர் 2026 : மலேசியாவின் மலாக்கா மாநிலத்தில் பனிப்புகை காரணமாக காற்றின் தரம் பாதிக்கப்பட்டுள்ளதைத் தொடர்ந்து, அக்டோபர் 13, செவ்வாய்க்கிழமை அனைத்து பள்ளிகளையும் மூட உத்தரவிடப்பட்டுள்ளது. இதனை மலாக்கா மாநிலக் கல்வித்துறை அறிவித்துள்ளது.
பள்ளிகள் மூடப்படும் காலத்தில் மாணவர்களின் கல்வி பாதிக்கப்படாமல் இருக்க, வீட்டிலிருந்து கற்றல் மற்றும் கற்பித்தல் நடவடிக்கைகள் (PdPR) தொடர்ந்து நடைபெறும். ஆசிரியர்கள் மற்றும் கல்வி நிர்வாகப் பணியாளர்களும் வீட்டிலிருந்து பணியாற்ற அனுமதிக்கப்பட்டுள்ளனர். தனியார் மற்றும் சர்வதேசப் பள்ளிகளுக்கும் இந்த அறிவிப்பு பொருந்தும். விடுதிகளில் தங்கியுள்ள மாணவர்கள், தங்களது பள்ளி விடுதிகளிலிருந்தே கற்றல் நடவடிக்கைகளைத் தொடர வேண்டும்.
இருப்பினும், சிறப்புப் பள்ளிகளுக்கான சேர்க்கை மதிப்பீட்டுத் தேர்வான பி.கே.எஸ்.கே. (PKSK) மற்றும் மலேசிய இஸ்லாமிய உயர்நிலைச் சான்றிதழ் தேர்வான எஸ்.டி.ஏ.எம். (STAM) ஆகியவை ஏற்கெனவே திட்டமிடப்பட்ட அட்டவணைப்படி நடைபெறும் என அறிவிக்கப்பட்டுள்ளது. இந்தத் தேர்வுகளில் பங்கேற்கும் மாணவர்கள், தேர்வு தொடர்பான கூடுதல் அறிவுறுத்தல்களுக்கு மலாக்கா மாநிலக் கல்வித்துறையின் அதிகாரப்பூர்வ முகநூல் பக்கத்தைப் பார்க்குமாறு கேட்டுக்கொள்ளப்பட்டுள்ளனர்.
காற்றுத் தரக் குறியீடு (IPU) உள்ளிட்ட நிலவரங்களைத் தொடர்ந்து கண்காணித்து வருவதாகக் கல்வித்துறை தெரிவித்துள்ளது. பள்ளிகளின் செயல்பாடுகளில் ஏதேனும் மாற்றங்கள் ஏற்பட்டால், அதிகாரப்பூர்வ வழிகளில் தகவல் வெளியிடப்படும் என்றும் தெரிவிக்கப்பட்டுள்ளது.
பெற்றோர், பாதுகாவலர்கள், தேர்வர்கள் மற்றும் பள்ளி நிர்வாகத்தினர் சமீபத்திய அறிவிப்புகளுக்காக மலாக்கா மாநிலக் கல்வித்துறையின் அதிகாரப்பூர்வ தகவல் சேனல்களைப் பின்பற்றுமாறு அறிவுறுத்தப்பட்டுள்ளனர். மாணவர்கள் மற்றும் கல்விப் பணியாளர்களின் உடல்நலம், பாதுகாப்பு ஆகியவற்றுக்கு முன்னுரிமை அளிக்கப்படும் என்றும் கல்வித்துறை தெரிவித்துள்ளது.
