கோலாலம்பூர், 06 அக்டோபர் 2026 : வீட்டுவசதி, பொருளாதாரம், வளர்ச்சி, நகர்ப்புற நலன் மற்றும் சமூகப் பிரச்சினைகள் உள்ளிட்ட மக்களின் முக்கிய விவகாரங்கள் தொடர்பான செய்திகளுக்கு ஊடகங்கள் தொடர்ந்து முக்கியத்துவம் அளிக்க வேண்டும் என்று மலேசிய வீடமைப்பு மற்றும் உள்ளாட்சி அமைச்சர் நாக கோர் மிங் வலியுறுத்தியுள்ளார்.
மக்களின் வாழ்க்கையை நேரடியாகப் பாதிக்கும் முக்கிய விவகாரங்கள் குறித்த துல்லியமான மற்றும் பயனுள்ள செய்தி அறிக்கைகள், நாட்டின் பொருளாதார வளர்ச்சிக்கு உதவியாக இருக்கும் என்று அவர் தெரிவித்தார்.
ஊடகத் துறையினர் மக்களிடம் கொண்டு சேர்க்கப்படும் ஒவ்வொரு தகவலும் துல்லியமாகவும், தெளிவாகவும், எந்தவிதமான திரிபும் இல்லாமலும் இருப்பதை உறுதி செய்ய வேண்டிய பொறுப்பு உள்ளதாகவும் நாக கோர் மிங் கூறினார்.
திங்கட்கிழமை இரவு கோலாலம்பூரில் நடைபெற்ற 2026-ஆம் ஆண்டுக்கான வீடமைப்பு மற்றும் உள்ளாட்சி அமைச்சின் ஊடகச் சிறப்பு விருது விழாவில் உரையாற்றியபோது அவர் இதனைத் தெரிவித்தார்.
நாட்டின் வளர்ச்சிப் பணிகளில் ஊடகங்களும் அரசாங்கமும் நெருக்கமாக இணைந்து செயல்படுவது, பொறுப்பான மற்றும் முதிர்ச்சியான தகவல் தொடர்புச் சூழலை உருவாக்குவதற்கு முக்கியமானது என்றும் அவர் குறிப்பிட்டார்.
மேலும், அமைச்சின் திட்டங்கள் மற்றும் சாதனைகள் குறித்த தகவல்களை மக்களிடம் துல்லியமாகக் கொண்டு சேர்ப்பதில் ஊடகங்கள் வழங்கி வரும் ஒத்துழைப்புக்கு நாக கோர் மிங் நன்றி தெரிவித்தார்.
இதனிடையே, வீடமைப்பு மற்றும் உள்ளாட்சி அமைச்சு தற்போது பிளாட்டினம் அந்தஸ்துடன் சிறந்த மூன்று அமைச்சுகளில் ஒன்றாக அங்கீகரிக்கப்பட்டுள்ளதாகவும் அவர் தெரிவித்தார்.
இரண்டு ஆண்டுகளுக்கும் குறைவான காலகட்டத்தில் அமைச்சு ஏழு மலேசிய சாதனைப் புத்தக (Malaysia Book of Records) சாதனைகளைப் பதிவு செய்துள்ளதாகவும், தேசிய மேம்பாட்டு விருது மற்றும் பிரதமர் புதுமை விருது உள்ளிட்ட பல்வேறு விருதுகளையும் பெற்றுள்ளதாகவும் நாக கோர் மிங் கூறினார்.
