மாலத்தீவு, 15 செப்டம்பர் 2026 : மலேசியாவுக்கும் மாலத்தீவுக்கும் இடையிலான 58 ஆண்டுகால தூதரக உறவை மேலும் வலுப்படுத்தும் வகையில், இரு நாடுகளுக்கும் இடையே வர்த்தகம், முதலீடு, சுற்றுலா, திறன் மேம்பாடு மற்றும் தொழில்நுட்பத் துறைகளில் புதிய வாய்ப்புகளை உருவாக்குவது குறித்து பேச்சுவார்த்தை நடைபெற்றது.
முதலீடு, வர்த்தகம் மற்றும் தொழில்துறை அமைச்சர் டத்தோ ஸ்ரீ ஜொஹாரி அப்துல் கானி, பிரதமர் டத்தோ ஸ்ரீ அன்வார் இப்ராஹிமுடன் இணைந்து மாலத்தீவு அதிபர் டாக்டர் முகமது முய்சுவை சந்தித்தார். இந்த இருதரப்பு சந்திப்பின்போது, இரு நாடுகளுக்கும் இடையிலான ஒத்துழைப்பை நிலையான முறையில் மேலும் விரிவுபடுத்தக்கூடிய துறைகள் குறித்து கலந்துரையாடப்பட்டது.
வர்த்தகம் மற்றும் முதலீட்டை அதிகரிப்பது, இரு நாடுகளைச் சேர்ந்த வர்த்தக நிறுவனங்களுக்கு இடையே அதிக தொடர்புகளை ஏற்படுத்துவது, சுற்றுலா மற்றும் ஹலால் தொழில்துறைகளில் ஒத்துழைப்பை வலுப்படுத்துவது உள்ளிட்டவை குறித்து ஆலோசிக்கப்பட்டது. மேலும், கல்வி, திறன் பயிற்சி மற்றும் திறமையான மனிதவள மேம்பாட்டிலும் இணைந்து செயல்படுவதற்கான வாய்ப்புகள் குறித்து கவனம் செலுத்தப்பட்டது.
எதிர்கால பொருளாதார வளர்ச்சியை கருத்தில் கொண்டு, டிஜிட்டல் மயமாக்கல், செயற்கை நுண்ணறிவு (AI), இணையப் பாதுகாப்பு உள்ளிட்ட துறைகளில் மலேசியாவின் நிபுணத்துவத்தை மாலத்தீவுடன் பகிர்ந்து கொள்வது குறித்தும் பேசப்பட்டது. இதனுடன், பல்வேறு மூலோபாயத் துறைகளில் விரிவான ஒத்துழைப்புக்கான வாய்ப்புகளும் ஆராயப்பட்டன.
இதன் தொடர்ச்சியாக, மலேசியா மற்றும் மாலத்தீவு இடையே பல புரிந்துணர்வு ஒப்பந்தங்கள் (MoU) பரிமாறிக் கொள்ளப்பட்டன. இரு நாடுகளின் உறவு வெறும் தூதரக உறவாக மட்டுமின்றி, புதிய சந்தைகளைத் திறப்பது, முதலீடுகளை ஈர்ப்பது, திறமைகளை மேம்படுத்துவது மற்றும் இரு நாட்டு மக்களுக்கும் புதிய வாய்ப்புகளை உருவாக்குவது என அடுத்தகட்ட ஒத்துழைப்பாக அமைய வேண்டும் என வலியுறுத்தப்பட்டது.
