பினாங்கு, 07 செப்டம்பர் 2026 : மின்னியல் உலகில் பெற்றோர்கள் எதிர்கொள்ளும் சவால்கள் மற்றும் பிள்ளைகளுடன் சிறந்த முறையில் தொடர்புகொள்வதற்கான வழிமுறைகள் குறித்து விழிப்புணர்வை ஏற்படுத்தும் வகையில் ‘மின்னியல் உலகில் பெற்றோர்கள் 2.0’ என்ற கருத்தரங்கு நடைபெற்றது.
மலேசிய இந்து சங்கத்தின் பினாங்கு மாநில கல்விப் பிரிவு மற்றும் குளுகோர் உள்ளூர் கிளை இணைந்து ஏற்பாடு செய்த இக்கருத்தரங்கு, செப்டம்பர் 6ஆம் தேதி ஜாலான் ஸ்காட்லாந்தில் உள்ள ராமகிருஷ்ண ஆசிரம கருத்தரங்கு மண்டபத்தில் பிற்பகல் 2 மணி முதல் மாலை 5.30 மணி வரை நடைபெற்றது.
மலேசிய இந்து சங்கத்தின் பினாங்கு மாநில மன்றத் தலைவர் விவேக ரத்னா தர்மன் ஆனந்தன், பிகேடி, பிஜேகே, பிஜேஎம், நிகழ்வை அதிகாரப்பூர்வமாகத் தொடக்கி வைத்தார். மாநில கல்விப் பிரிவு தலைவர் திருமதி திலகவதி மற்றும் குளுகோர் உள்ளூர் மன்றத் தலைவி விவேக ரத்னா கலா ராணி கெனிசன் ஆகியோர் நிகழ்வில் கலந்து கொண்டனர்.
சுமார் 30 பெற்றோர்கள் மற்றும் குழு உறுப்பினர்கள் இக்கருத்தரங்கில் பங்கேற்றனர். இன்றைய வேகமான மின்னியல் சூழலில் பிள்ளைகளுடன் பயனுள்ள முறையில் தொடர்புகொள்வது, நேர்மறையான பெற்றோர் அணுகுமுறைகளை வளர்த்துக்கொள்வது மற்றும் குடும்ப உறவுகளை வலுப்படுத்துவது தொடர்பான முக்கிய அம்சங்கள் கருத்தரங்கில் எடுத்துரைக்கப்பட்டன.
நிகழ்வில் திருமதி சிவசங்கரி, பிகேஜே, பயிற்றுநராகவும், நுகர்வோர் சங்கம் பினாங்கின் ஆய்வு அதிகாரியும் சமயப் பேச்சாளருமான எஸ். கணேசன் ஆகியோர் சிறப்புரையாற்றினர்.
பிள்ளைகளுடன் பயனுள்ள முறையில் தொடர்புகொள்வது மற்றும் வலுவான குடும்ப உறவுகளை உருவாக்கும் நேர்மறையான பெற்றோர் அணுகுமுறைகள் குறித்து நடைமுறை ஆலோசனைகள் வழங்கப்பட்டன. குழு கலந்துரையாடல்கள் மற்றும் கேள்வி–பதில் நிகழ்வுகளுடன் கருத்தரங்கு கலந்துரையாடல் முறையில் நடைபெற்றது.
கருத்தரங்கில் வழங்கப்பட்ட நடைமுறை ஆலோசனைகள் குடும்ப உறவுகளை மேம்படுத்துவதற்கு பயனுள்ளதாக இருந்ததாக பங்கேற்ற பெற்றோர்கள் தெரிவித்தனர். இதுபோன்ற பெற்றோர் தொடர்பான கருத்தரங்குகள் தொடர்ந்து நடத்தப்பட வேண்டும் என்றும் பலர் தங்களது விருப்பத்தைத் தெரிவித்தனர்.
இந்நிகழ்வை வெற்றிகரமாக நடத்துவதற்கு ஒத்துழைத்த இரு ஏற்பாட்டுக் குழுக்களுக்கும், ஆர்வத்துடன் பங்கேற்ற பெற்றோர்களுக்கும் ஏற்பாட்டாளர்கள் நன்றி தெரிவித்தனர்.
