கோலாலம்பூர், 29 ஆகஸ்ட் 2026 : ஜாலான் சான் பெங் தமிழ்ப்பள்ளியில் பள்ளி அளவிலான சுதந்திர மாத விழா சிறப்பாகத் தொடங்கப்பட்டது. பள்ளிக் கூட்டத்துடன் தொடங்கிய நிகழ்ச்சியில், பள்ளித் தலைமையாசிரியை திருமதி எம். மணியரசி உரையாற்றி, சுதந்திர மாத விழாவை அதிகாரப்பூர்வமாகத் தொடங்கி வைத்தார்.
இந்நிகழ்வில் “மலேசியா மடானி – நல்வாழ்வை அனுபவிப்போம்” என்ற கருப்பொருள் மாணவர்களுக்கு அறிமுகப்படுத்தப்பட்டதுடன், ஒற்றுமை, நல்லிணக்கம், நல்வாழ்வு மற்றும் அனைவரும் இணைந்து முன்னேறுதல் ஆகிய மதிப்புகள் குறித்து எடுத்துரைக்கப்பட்டது.
சுதந்திர மாதக் கொண்டாட்டத்தின் மூலம் மாணவர்களிடையே நாட்டுப்பற்று, ஒற்றுமை மற்றும் மலேசிய உணர்வை வளர்ப்பதுடன், நாட்டின் சுதந்திரத்தின் முக்கியத்துவத்தையும் அவர்களுக்கு உணர்த்தும் வகையில் பல்வேறு நடவடிக்கைகள் முன்னெடுக்கப்பட உள்ளன. கல்வியின் மூலம் அறிவையும், நாட்டுப்பற்றின் மூலம் பொறுப்புணர்வையும் வளர்த்து, எதிர்காலத்தில் நாட்டின் முன்னேற்றத்திற்கு பங்களிக்கும் தலைமுறையை உருவாக்குவதே இத்தகைய நிகழ்ச்சிகளின் முக்கிய நோக்கமாகும்.
