28 ஆகஸ்ட் 2026 : 29-வது ஆசியான் தொழிலாளர் அமைச்சர்கள் கூட்டத்தையொட்டி மலேசிய மனிதவள அமைச்சர் டத்தோ ஸ்ரீ ராமணன் ராமகிருஷ்ணன் மற்றும் தாய்லாந்து தொழிலாளர் அமைச்சர் ஜுலாபுன் அமோர்ன்விவாட் இடையே உயர்மட்ட இருதரப்பு சந்திப்பு பாங்காக்கில் நடைபெற்றது.
சந்திப்பின்போது, தொழிலாளர் ஆட்சேர்ப்பு மற்றும் வேலைவாய்ப்பு தொடர்பான சட்ட கட்டமைப்புகளை வலுப்படுத்தும் வகையில் இருநாடுகளும் நெருக்கமான ஒத்துழைப்பை மேற்கொள்ள ஒப்புக்கொண்டன.
மேலும், 2003-ஆம் ஆண்டு கையெழுத்தான தொழிலாளர் ஒத்துழைப்புக்கான புரிந்துணர்வு ஒப்பந்தத்தை தற்போதைய பொருளாதார தேவைகளுக்கு ஏற்ப புதுப்பித்து நவீனப்படுத்த இரு அமைச்சர்களும் கொள்கை ரீதியில் இணக்கம் தெரிவித்தனர். தொழிலாளர் நலப் பாதுகாப்பை மேம்படுத்துதல் மற்றும் ஆட்சேர்ப்பு நடைமுறைகளை சீரமைத்தல் உள்ளிட்ட அம்சங்களும் இதில் இடம்பெறும்.
இதனையடுத்து, புதிய புரிந்துணர்வு ஒப்பந்தத்துக்கான குறிப்பிட்ட விதிமுறைகளை பேச்சுவார்த்தை நடத்தி இறுதி செய்ய இருநாடுகளின் மனிதவள மற்றும் தொழிலாளர் அமைச்சக உயர் அதிகாரிகள் கூட்டத்தை நடத்த அதிகாரம் வழங்கப்பட்டுள்ளது.
தொழில்நுட்ப மற்றும் தொழிற்கல்வி பயிற்சி (TVET) துறையிலும் இருநாடுகளுக்கு இடையிலான ஒத்துழைப்பை விரிவுபடுத்துவது குறித்து ஆலோசிக்கப்பட்டது. குறிப்பாக, டிஜிட்டல் TVET, பசுமைத் திறன்கள், மேம்பட்ட உற்பத்தி மற்றும் இணையப் பாதுகாப்பு போன்ற வளர்ந்து வரும் துறைகளில் மாணவர் மற்றும் பயிற்றுநர் பரிமாற்றத் திட்டங்களை மேம்படுத்துவது குறித்து விவாதிக்கப்பட்டது.
இருநாடுகளுக்கும் இடையிலான தொழிலாளர் இடம்பெயர்வு பாதுகாப்பானதாகவும், வெளிப்படையானதாகவும், திறமையானதாகவும் இருப்பதை உறுதி செய்ய தாய்லாந்து தொடர்ந்து மலேசியாவுடன் இணைந்து செயல்படும் என தாய்லாந்து தொழிலாளர் அமைச்சர் உறுதியளித்தார்.
தொழிலாளர் கட்டமைப்புகள் தற்போதைய தொழில்துறை தேவைகள் மற்றும் சர்வதேச தொழிலாளர் பாதுகாப்பு தரநிலைகளுடன் இணைந்திருக்க வேண்டியதன் அவசியத்தை ராமணன் ராமகிருஷ்ணன் வலியுறுத்தினார்.
