28 ஆகஸ்ட் 2026 : மலேசிய தமிழ் கலை, ஊடகம், கலாசாரம் மற்றும் பொழுதுபோக்குத் துறைகளில் சிறப்பான பங்களிப்பை வழங்கி வரும் திறமையாளர்களை கௌரவிக்கும் நோக்கில் 8-வது விமர்சகன் விருதுகள் 2026 நடைபெறவுள்ளது. விமர்சகன் தமிழ் மீடியா ஏற்பாட்டில் நடைபெறும் இந்த விருது விழா, வரும் ஆகஸ்ட் 30-ஆம் தேதி, ஞாயிற்றுக்கிழமை, கோலாலம்பூரில் உள்ள விஸ்மா துன் சம்பந்தன் அரங்கில் பிற்பகல் 3 மணி முதல் இரவு 8 மணி வரை நடைபெறவுள்ளது.
இந்த ஆண்டுக்கான விருது விழாவில் சிறந்த குறும்படங்கள் மற்றும் இசை காணொளிகளை கௌரவிக்கும் விமர்சகன் குறும்படம் மற்றும் இசை காணொளி விருது 2026, வாழ்நாள் முழுவதும் துறை சார்ந்த பங்களிப்பை வழங்கியவர்களுக்கான விமர்சகன் வாழ்நாள் சாதனையாளர் விருது 2026 உள்ளிட்ட விருதுகள் வழங்கப்படவுள்ளன.
மேலும், மலேசிய ஊடக மற்றும் பொழுதுபோக்குத் துறையில் குறிப்பிடத்தக்க பங்களிப்பை வழங்கியவர்களை கௌரவிக்கும் அக்னி சுகுமார் மலேசிய ஊடக ஜாம்பவான் விருது 2026, இந்திய செவ்வியல் இசை மற்றும் பாடல் துறையில் சிறந்து விளங்குவோருக்கான விமர்சகன் கோல்டன் விருது 2026 மற்றும் பொழுதுபோக்குத் துறையில் 20 ஆண்டுகளுக்கும் மேலாக பங்களிப்பு செய்த மலேசியர்களை கௌரவிக்கும் கே.எஸ். மணியம் விருது 2026 ஆகியவையும் வழங்கப்படவுள்ளன.
நிகழ்ச்சியில் நாளிதழ்கள், தொலைக்காட்சிகள், டிஜிட்டல் ஊடகங்கள், புகைப்படக் கலைஞர்கள், உள்ளடக்க உருவாக்குநர்கள் மற்றும் பிற ஊடகப் பிரதிநிதிகள் கலந்துகொள்ள அழைப்பு விடுக்கப்பட்டுள்ளது. இந்த விருது விழா, மலேசிய தமிழ் படைப்பாற்றல் சமூகத்தின் சாதனைகளை கொண்டாடுவதோடு, எதிர்கால தலைமுறையினருக்கு ஊக்கமளிக்கும் முக்கிய நிகழ்வாக அமையும் என ஏற்பாட்டுக் குழுவினர் தெரிவித்துள்ளனர்.
