தேனி, 08 ஆகஸ்ட் 2026 : மேகமலை மற்றும் வருசநாடு உள்ளிட்ட மேற்குத் தொடர்ச்சி மலைப் பகுதிகளில் உள்ள வனப்பகுதிகளில் வசிக்கும் மக்களை வெளியேற்ற உச்சநீதிமன்றம் பிறப்பித்த உத்தரவுக்கு எதிர்ப்பு தெரிவித்து, நூற்றுக்கணக்கான மக்கள் தேனி மாவட்ட ஆட்சியர் அலுவலகம் முன்பு போராட்டத்தில் ஈடுபட்டனர்.
வெள்ளிக்கிழமை நடைபெற்ற இந்தப் போராட்டத்தில் ஆண்டிப்பட்டி சட்டமன்ற உறுப்பினர் மகாராஜன், தேனி நாடாளுமன்ற உறுப்பினர் தங்க தமிழ்செல்வன், அரசியல் கட்சிகளின் நிர்வாகிகள் மற்றும் பல்வேறு அமைப்புகளின் பிரதிநிதிகள் கலந்து கொண்டனர்.
மேகமலை மற்றும் வருசநாடு உள்ளிட்ட மேற்குத் தொடர்ச்சி மலைப் பகுதிகளில் உள்ள 50-க்கும் மேற்பட்ட கிராமங்களில் வசிக்கும் மக்களை வெளியேற்றும் உத்தரவை மறுபரிசீலனை செய்யக் கோரி, தமிழக அரசு உச்சநீதிமன்றத்தில் மறுஆய்வு மனு தாக்கல் செய்ய வேண்டும் என போராட்டத்தில் வலியுறுத்தப்பட்டது.
மேலும், நீண்டகாலமாக அப்பகுதிகளில் வசித்து வரும் மக்களுக்கு வன உரிமைச் சட்டத்தின் கீழ் நில உரிமைகள் வழங்க வேண்டும் என்றும் போராட்டக்காரர்கள் கோரிக்கை விடுத்தனர்.
உச்சநீதிமன்ற உத்தரவை அமல்படுத்தத் தவறினால் துணை ராணுவப் படைகளைப் பயன்படுத்தலாம் என்ற கருத்துக்கும் போராட்டத்தில் எதிர்ப்பு தெரிவிக்கப்பட்டது. அப்பகுதிகளில் பல தலைமுறைகளாக வசித்து வரும் மக்களை ஆக்கிரமிப்பாளர்கள் எனக் கருதக் கூடாது என்றும், அவர்களின் நில உரிமை தொடர்பான பிரச்சினைகளுக்கு உரிய தீர்வு காண வேண்டும் என்றும் வலியுறுத்தப்பட்டது.
