சென்னை, 04 ஆகஸ்ட் 2026 : தமிழக சட்டப்பேரவை கூட்டத் தொடர் நாளை (ஆகஸ்ட் 5) தொடங்குகிறது. இதில் முதலமைச்சர் சி. ஜோசப் விஜய் தலைமையிலான தமிழக வெற்றிக் கழக (TVK) அரசின் முதல் முழுமையான நிதிநிலை அறிக்கை தாக்கல் செய்யப்படவுள்ளது. இதனால் மாநிலம் முழுவதும் பெரும் எதிர்பார்ப்பு ஏற்பட்டுள்ளது.
சட்டப்பேரவைத் தலைவர் ஜே.சி.டி. பிரபாகர் முன்னதாக வெளியிட்ட அறிவிப்பின்படி, கூட்டத் தொடரின் முதல் நாளிலேயே மாநில பட்ஜெட்டை நிதியமைச்சர் மரியா வில்சன் தாக்கல் செய்ய உள்ளார். தொடர்ந்து ஆகஸ்ட் 6ஆம் தேதி வேளாண் பட்ஜெட் தனியாக சட்டப்பேரவையில் சமர்ப்பிக்கப்படும்.
புதிய அரசின் முதல் பட்ஜெட் என்பதால், கல்வி, சுகாதாரம், வேலைவாய்ப்பு, தொழில் முதலீடு, விவசாயம், சமூக நலத் திட்டங்கள் மற்றும் அடிப்படை கட்டமைப்பு மேம்பாடு தொடர்பான பல முக்கிய அறிவிப்புகள் இடம்பெறலாம் என எதிர்பார்க்கப்படுகிறது. மேலும், தேர்தல் வாக்குறுதிகளை நிறைவேற்றுவதற்கான நிதி ஒதுக்கீடுகளும் இந்த பட்ஜெட்டில் இடம்பெற வாய்ப்புள்ளதாக அரசியல் மற்றும் பொருளாதார வட்டாரங்கள் கருதுகின்றன.
இந்த பட்ஜெட், முதலமைச்சர் விஜய் தலைமையிலான அரசின் பொருளாதாரக் கொள்கைகள் மற்றும் அடுத்த ஐந்து ஆண்டுகளுக்கான வளர்ச்சித் திட்டங்களை வெளிப்படுத்தும் முக்கிய ஆவணமாகக் கருதப்படுகிறது. எனவே, அரசியல் கட்சிகள், தொழில் துறையினர், விவசாயிகள் மற்றும் பொதுமக்கள் மத்தியில் இந்த பட்ஜெட் மீது அதிக கவனம் நிலவுகிறது.
