19 ஜூலை 2026 : மலேசியாவின் பணவீக்க விகிதம் ஜூன் மாதத்தில் 2.0 சதவீதத்திலிருந்து 1.9 சதவீதமாக குறைந்துள்ளதாக தெரிவிக்கப்பட்டுள்ளது. எரிபொருள் விலை குறைந்ததே இந்த பணவீக்கச் சரிவுக்கு முக்கிய காரணமாக அமைந்துள்ளதாக பொருளாதார ஆய்வு நிறுவனமான MBSB Research தெரிவித்துள்ளது.
அறிக்கையின்படி, போக்குவரத்துத் துறையின் பணவீக்கம் மே மாதத்தில் பதிவான 3.8 சதவீதத்திலிருந்து 2.8 சதவீதமாக குறைந்துள்ளது. அதேவேளையில், அடிப்படை பணவீக்கமும் (Core Inflation) 1.9 சதவீதமாக மிதமான நிலையில் தொடர்ந்துள்ளது. உணவுப் பணவீக்கம் 1.4 சதவீதமாக மாற்றமின்றி நீடித்துள்ளது.
எனினும், உலகளாவிய புவிசார் அரசியல் பதற்றம், ரிங்கிட்டின் மதிப்பு சரியும் அபாயம் மற்றும் உள்நாட்டு உற்பத்திச் செலவுகள் அதிகரிப்பது போன்ற காரணங்களால் எதிர்காலத்தில் விலை உயர்வு ஏற்படக்கூடும் என்று MBSB Research எச்சரித்துள்ளது. மேலும், உற்பத்தியாளர் விலைக் குறியீடு (PPI) மே மாதத்தில் 7.8 சதவீதம் உயர்ந்திருப்பதும், அதன் தாக்கம் அடுத்த சில மாதங்களில் நுகர்வோர் விலைகளில் பிரதிபலிக்கலாம் என்றும் தெரிவிக்கப்பட்டுள்ளது.
இந்தச் சவால்கள் இருந்தபோதிலும், 2026-ஆம் ஆண்டுக்கான மலேசியாவின் ஒட்டுமொத்த பணவீக்க விகிதம் 2.0 சதவீதம் என்ற அளவில் இருக்கும் என்ற தனது கணிப்பை MBSB Research மாற்றாமல் தொடர்ந்துள்ளது.
