நெகிரி செம்பிலான், 17 ஜூலை 2026 : இன, மத மற்றும் கலாசாரப் பன்முகத்தன்மை கொண்ட மலேசிய சமூகத்தின் நல்லிணக்கம், நிலைத்தன்மை மற்றும் முன்னேற்றத்திற்கு தேசிய ஒற்றுமை அடிப்படையாக அமைகிறது என்று தேசிய ஒற்றுமைத் துறை அமைச்சர் யுனேஸ்வரன் ராமராஜ் தெரிவித்துள்ளார்.
தேசிய ஒற்றுமை அமைச்சின் கீழ் செயல்படும் தேசிய ஒற்றுமை மற்றும் தேசிய ஒருமைப்பாட்டுத் துறை (JPNIN) அலுவலகங்களுக்கு மேற்கொண்டு வரும் பணிப்பயணத்தின் ஒரு பகுதியாக, அமைச்சர் இன்று செரெம்பானில் அமைந்துள்ள நெகிரி செம்பிலான் மாநில JPNIN அலுவலகத்திற்கு நேரில் சென்று பார்வையிட்டார்.
இந்தப் பயணத்தில் JPNIN தலைமை இயக்குநர் சுல்கிஃப்லி ஹாஷிம், துணைத் தலைமை இயக்குநர் நோர்சாஹிருடின் அமின் ஹுசின் மற்றும் நெகிரி செம்பிலான் மாநில இயக்குநர் மார்லினா தெர்முடி ஆகியோரும் உடனிருந்தனர்.
அலுவலகத்தில் நடைபெற்ற விளக்கக் கூட்டத்தில், நெகிரி செம்பிலானின் ஏழு மாவட்டங்களிலும் தேசிய ஒற்றுமையை வலுப்படுத்தும் நோக்கில் பல்வேறு அமைப்புகள் செயல்பட்டு வருவதாக தெரிவிக்கப்பட்டது. அதன்படி, மாநிலம் முழுவதும் 365 ருகுன் தெத்தாங்கா (Kawasan Rukun Tetangga) பகுதிகள், 337 ருகுன் நெகாரா கழகங்கள், 303 தன்னார்வ ரோந்துப் படைகள், 120 ஒற்றுமை முன்பள்ளிகள் (Tabika), 2 ஒற்றுமை குழந்தைகள் பராமரிப்பு மையங்கள் (Taska), 28 சமூக சமரச மத்தியஸ்தர்கள், 12 ருகுன் நெகாரா செயலகங்கள் மற்றும் 7 யூனிட்டி (Uniti) அணிகள் செயல்பட்டு வருகின்றன.
கடந்த மாதம் பிரதமர் அறிவித்தபடி, ருகுன் தெத்தாங்கா (KRT) அமைப்புகளுக்கான ஆண்டு மானியம் அடுத்த ஆண்டு முதல் RM6,000 இலிருந்து RM10,000 ஆக உயர்த்தப்படுவது, ஒற்றுமை மற்றும் சமூக நலன் சார்ந்த நடவடிக்கைகளை மேலும் வலுப்படுத்த உதவும் என்றும் அமைச்சர் தெரிவித்தார்.
நெகிரி செம்பிலான் மாநில JPNIN அலுவலர்களின் அர்ப்பணிப்பு மற்றும் சேவைக்கு நன்றி தெரிவித்த அமைச்சர் யுனேஸ்வரன் ராமராஜ், மக்களுடன் நெருக்கமாக இருந்து, ஒற்றுமை நிறைந்த மலேசியாவை உருவாக்கும் பணியில் JPNIN-இன் அனைத்து பிரிவுகளையும் அமைச்சகம் தொடர்ந்து வலுப்படுத்தும் என்றும் உறுதியளித்தார்.
