கோலாலம்பூர், 08 ஜூலை 2026 : தேசிய நல்லிணக்க ஆணையம் (Suruhanjaya Keharmonian Negara – SKN) அமைப்பது தொடர்பான பரிந்துரை இன்னும் ஆய்வு மற்றும் பல்வேறு தரப்பினருடனான கலந்தாலோசனை நிலையிலேயே உள்ளதாகவும், இதுகுறித்து அரசு இதுவரை எந்த இறுதி முடிவையும் எடுக்கவில்லை என்றும் அமைச்சர் யுனேஸ்வரன் ராமராஜ் தெரிவித்துள்ளார்.
நாடாளுமன்றத்தின் மக்களவையில், குவாந்தான் நாடாளுமன்ற உறுப்பினர் எழுப்பிய வாய்மொழி கேள்விக்கு பதிலளித்த அவர், தேசிய நல்லிணக்க ஆணையம் தொடர்பான எந்தவொரு பரிந்துரையும் மலேசிய அரசியலமைப்பால் உறுதி செய்யப்பட்ட அடிப்படை அம்சங்களை எவ்விதத்திலும் பாதிக்காது என்று அரசின் சார்பில் உறுதியளித்தார்.
இஸ்லாம் கூட்டாட்சி சமயமாக இருப்பது, ஷரியா நீதிமன்றத்தின் அதிகார வரம்பு, மலாய் ஆட்சியாளர்களின் (ராஜாக்கள்) நிறுவனம், மலாயர்கள் மற்றும் சபா, சரவாக் பூமிபுத்ராக்களின் சிறப்பு உரிமைகள், மலாய் மொழியின் தேசிய மொழி அந்தஸ்து உள்ளிட்ட அரசியலமைப்பின் முக்கிய அடிப்படை அம்சங்களில் எந்த மாற்றமும் இருக்காது என்று அவர் வலியுறுத்தினார்.
பல்வேறு இனங்கள் மற்றும் மதங்களை கொண்ட மலேசிய சமூகத்தில் நல்லிணக்கத்தை வலுப்படுத்துவது, கலந்துரையாடலை ஊக்குவிப்பது, சமரச மனப்பான்மையை வளர்ப்பது மற்றும் சமூக மோதல்களைத் தடுப்பது ஆகியவையே தேசிய நல்லிணக்க ஆணையத்தின் முக்கிய நோக்கங்களாக ஆய்வு செய்யப்பட்டு வருவதாக அமைச்சர் யுனேஸ்வரன் ராமராஜ் தெரிவித்தார்.
மேலும், “தேசிய நல்லிணக்கம் என்பது அரசின் பொறுப்பு மட்டுமல்ல; ஒவ்வொரு குடிமகனின் பொறுப்பும் ஆகும்” என்றும் அவர் வலியுறுத்தினார்.
