17 ஜூன் 2026 : 2026 FIFA உலகக் கோப்பை கால்பந்து போட்டி அமெரிக்கா, மெக்சிகோ மற்றும் கனடா ஆகிய நாடுகள் இணைந்து நடத்தும் நிலையில், உலகின் மிகப்பெரிய விளையாட்டு திருவிழா உற்சாகமாக தொடங்கியுள்ளது. 48 அணிகள் பங்கேற்கும் முதல் உலகக் கோப்பையாகவும், மூன்று நாடுகள் இணைந்து நடத்தும் முதல் உலகக் கோப்பையாகவும் இந்தத் தொடர் வரலாற்றுச் சிறப்பைப் பெற்றுள்ளது.
போட்டி தொடங்கியுள்ள நிலையில், மெக்சிகோ ரசிகர்களின் கால்பந்து ஆர்வம் உலக கவனத்தை ஈர்த்துள்ளது. தங்களது தேசிய அணியின் ஆட்டங்களை நேரில் காண பல ரசிகர்கள் வங்கி கடன்கள் மற்றும் தனிநபர் நிதி வசதிகளை நாடி வருவதாக தகவல்கள் வெளியாகியுள்ளன.
மெக்சிகோவில் நடைபெற்ற கருத்துக் கணிப்பொன்றின்படி, ஒரு பகுதி ரசிகர்கள் தங்களது சேமிப்புப் பணம் மற்றும் டெபிட் கார்டுகளை பயன்படுத்தி செலவுகளை மேற்கொள்கின்றனர். அதேவேளையில் பெரும்பாலானோர் தனிநபர் கடன் உள்ளிட்ட நிதி உதவிகளை நாடி உலகக் கோப்பை அனுபவத்தை பெற முயற்சிக்கின்றனர்.
மெக்சிகோவில் நடைபெறும் ஆட்டங்களை நேரில் காண டிக்கெட், தங்குமிடம், உணவு மற்றும் போக்குவரத்து செலவுகள் சேர்த்து பல லட்சம் ரூபாய் வரை செலவாகும் என மதிப்பிடப்படுகிறது. இதனால் உயர்ந்த டிக்கெட் விலைகள் குறித்து ரசிகர்கள் மத்தியில் அதிருப்தி அதிகரித்துள்ளது. மெக்சிகோ அதிபர் கிளாடியா ஷெயின்போம் கூட உலகக் கோப்பை டிக்கெட்டுகள் சாதாரண மக்களுக்கு எட்டாத அளவுக்கு விலை உயர்ந்துள்ளதாக கருத்து தெரிவித்திருந்தார்.
உலகக் கோப்பையின் தொடக்க ஆட்டத்தில் மெக்சிகோ அணி தென் ஆப்பிரிக்காவை 2-0 என்ற கோல் கணக்கில் வீழ்த்தி வெற்றிகரமாக தனது பயணத்தை ஆரம்பித்தது. மெக்சிகோ சிட்டியின் அஸ்டெகா மைதானத்தில் நடைபெற்ற இந்தப் போட்டி ஆயிரக்கணக்கான ரசிகர்களின் ஆரவாரத்துடன் அரங்கேறியது.
ஜூன் 11 முதல் ஜூலை 19 வரை நடைபெறும் இந்த உலகக் கோப்பை தொடரில் மொத்தம் 104 போட்டிகள் நடத்தப்படவுள்ளன. அமெரிக்கா, மெக்சிகோ மற்றும் கனடாவின் 16 நகரங்கள் போட்டிகளை நடத்துகின்றன. உலக கால்பந்தின் புதிய அத்தியாயமாக கருதப்படும் இந்தத் தொடர், விளையாட்டு உற்சாகத்துடன் டிக்கெட் விலை, ரசிகர்களின் அணுகல் மற்றும் செலவுகள் போன்ற விவாதங்களையும் உருவாக்கியுள்ளது.
