டோக்கியோ,16 ஜூன் 2026 : உலகளாவிய கச்சா எண்ணெய் விலைகள் கடுமையாக சரிந்ததைத் தொடர்ந்து, ஆசிய பங்குச் சந்தைகள் இன்று குறிப்பிடத்தக்க உயர்வைப் பதிவு செய்தன.
அமெரிக்கா மற்றும் ஈரான் இடையிலான பதற்றம் தணிவடைந்து, அமைதி ஒப்பந்தம் குறித்த நம்பிக்கை அதிகரித்ததன் விளைவாக எண்ணெய் விநியோகத்தில் நிலைத்தன்மை ஏற்படும் என்ற எதிர்பார்ப்பு சந்தைகளில் உருவாகியுள்ளது. இதன் காரணமாக உலக எண்ணெய் விலைகள் 10 சதவீதத்திற்கும் அதிகமாக வீழ்ச்சியடைந்ததாக சந்தை வட்டாரங்கள் தெரிவித்தன.
எண்ணெய் விலை குறைந்ததால், ஆசியாவின் முக்கிய பங்குச் சந்தைகளில் முதலீட்டாளர்களின் நம்பிக்கை உயர்ந்தது. குறிப்பாக ஜப்பான், தென் கொரியா மற்றும் பிற முக்கிய சந்தைகளில் வாங்கும் நடவடிக்கைகள் அதிகரித்தன.
எண்ணெய் இறக்குமதியை அதிகம் சார்ந்துள்ள நாடுகளுக்கு இந்த விலைச் சரிவு சாதகமானதாக கருதப்படுகிறது. எரிசக்தி செலவுகள் குறைவதால் உற்பத்தி மற்றும் போக்குவரத்து செலவுகளும் குறையக்கூடும் என பொருளாதார நிபுணர்கள் தெரிவித்துள்ளனர்.
அண்மையில் மத்திய கிழக்கு பதற்றம் காரணமாக உயர்ந்திருந்த எண்ணெய் விலைகள், அமைதி பேச்சுவார்த்தைகள் முன்னேற்றம் கண்டதைத் தொடர்ந்து வேகமாக சரிந்துள்ளன. முன்னதாக, ஹோர்முஸ் நீரிணை தொடர்பான நம்பிக்கைகள் எண்ணெய் சந்தையில் பெரும் தாக்கத்தை ஏற்படுத்தியிருந்தன.
உலக பொருளாதார வளர்ச்சி குறித்த கவலைகள் நிலவினாலும், எரிசக்தி விலை குறைவு மற்றும் புவிசார் அரசியல் பதற்றம் தணிவடைந்துள்ளமை முதலீட்டாளர்களிடையே நேர்மறையான மனநிலையை உருவாக்கியுள்ளதாக சந்தை ஆய்வாளர்கள் தெரிவித்துள்ளனர்.
