கோலாலம்பூர், 27 மே 2026 : மாண்புமிகு மலேசிய பிரதமர் டத்தோ ஸ்ரீ அன்வர் இப்ராஹிம், பாகிஸ்தான் பிரதமர் திரு. ஷெஹ்பாஸ் ஷெரீப்புடன் தொலைபேசி மூலம் முக்கிய ஆலோசனை நடத்தியதாக தெரிவித்துள்ளார். இந்த உரையாடலில், இரு நாடுகளுக்கிடையிலான நீண்டகால நட்பு உறவுகளை மேலும் வலுப்படுத்துவது மற்றும் தற்போதைய பிராந்திய முன்னேற்றங்கள் குறித்து விரிவாக பேசப்பட்டதாக அவர் குறிப்பிட்டார்.
ஈதுல் அதா பண்டிகையை முன்னிட்டு, பாகிஸ்தான் மக்களுக்கும் பிரதமர் ஷெஹ்பாஸ் ஷெரீப்பிற்கும் தனது “ஸெலமத் ஹரி ராயா ஐடில் அதா” வாழ்த்துகளை அன்வர் இப்ராஹிம் தெரிவித்தார். தியாகம், சகோதரத்துவம் மற்றும் ஒற்றுமை ஆகிய பண்புகள் இஸ்லாமிய உலகின் அமைதி மற்றும் செழிப்பை மேலும் வலுப்படுத்தும் என்ற நம்பிக்கையையும் அவர் வெளிப்படுத்தினார்.
மேலும், ஈரான் மற்றும் அமெரிக்கா இடையிலான பேச்சுவார்த்தைகளில் ஏற்பட்டுள்ள சாதகமான முன்னேற்றங்கள் குறித்தும் இரு தலைவர்களும் விவாதித்தனர். குறிப்பாக, சர்வதேச வர்த்தகம் மற்றும் பாதுகாப்பிற்கு முக்கியத்துவம் வாய்ந்த ஹோர்முஸ் ஜலசந்தியை மீண்டும் திறப்பது தொடர்பான ஆலோசனைகள் கவனம் பெற்றதாக கூறப்பட்டது.
நடந்து வரும் மத்தியஸ்த முயற்சிகளில் பாகிஸ்தான் ஆற்றிவரும் பங்கிற்கும், அடுத்த கட்ட பேச்சுவார்த்தைகளை நடத்த முன்வந்துள்ளதற்கும் மலேசியா தனது பாராட்டுகளை தெரிவித்ததாக அன்வர் இப்ராஹிம் கூறினார்.
மேற்கு ஆசியப் பிராந்தியத்தில் நிலவும் பதற்ற நிலையை அமைதியான முறையில் தீர்க்க வேண்டும் என்பதில் மலேசியா உறுதியாக இருப்பதாகவும் அவர் வலியுறுத்தினார். அனைத்து பிரச்சனைகளும் உரையாடல், ராஜதந்திரம் மற்றும் அமைதியான அணுகுமுறைகள் மூலமே தீர்க்கப்பட வேண்டும் என்ற நிலைப்பாட்டை மலேசியா தொடர்ந்து கடைப்பிடிக்கும் என்றும் தெரிவித்தார்.
அதேவேளை, காசா மற்றும் லெபனானில் பொதுமக்களுக்கு எதிராக நடைபெற்று வரும் இஸ்ரேலிய தாக்குதல்கள் மற்றும் வன்முறைகளை தடுக்க சர்வதேச சமூகம் உறுதியான நடவடிக்கைகளை எடுக்க வேண்டிய அவசியம் குறித்தும் இரு தலைவர்களும் கருத்துகளை பகிர்ந்து கொண்டனர்.
நட்பு, பரஸ்பர மரியாதை மற்றும் உலக அமைதி, செழிப்பு ஆகியவற்றை அடிப்படையாகக் கொண்டு மலேசியா – பாகிஸ்தான் உறவுகள் தொடர்ந்து வலுப்பெறும் என்ற நம்பிக்கையையும் பிரதமர் அன்வர் இப்ராஹிம் தெரிவித்தார்.
