புதுடெல்லி, 27 மே 2026 : குவாட் கூட்டமைப்பு நாடுகளின் வெளியுறவு அமைச்சர்கள் கூட்டத்தை முன்னிட்டு, ஜப்பான் மற்றும் ஆஸ்திரேலியாவின் வெளியுறவு அமைச்சர்கள் இந்திய பிரதமர் நரேந்திர மோடியை புதுடெல்லியில் சந்தித்து முக்கிய பேச்சுவார்த்தை நடத்தினர்.
இந்த சந்திப்பில், இந்தோ-பசிபிக் பிராந்தியத்தில் அமைதி, பாதுகாப்பு மற்றும் பொருளாதார ஒத்துழைப்பை மேலும் வலுப்படுத்துவது குறித்து விவாதிக்கப்பட்டதாக தெரிவிக்கப்பட்டுள்ளது. இந்திய வெளியுறவு அமைச்சர் டாக்டர் எஸ். ஜெய்சங்கர் தலைமையில் நடைபெற்ற குவாட் கூட்டத்தில் இந்தியா, அமெரிக்கா, ஜப்பான் மற்றும் ஆஸ்திரேலியா ஆகிய நாடுகளின் பிரதிநிதிகள் பங்கேற்றனர்.
ஜப்பான் வெளியுறவு அமைச்சர் தோஷிமிட்சு மோடேகியை சந்தித்த பிரதமர் மோடி, இந்தியா – ஜப்பான் இடையிலான “சிறப்பு உத்திசார் மற்றும் உலகளாவிய கூட்டாண்மை” இந்தோ-பசிபிக் பிராந்தியத்தில் அமைதி மற்றும் செழிப்பை மேம்படுத்துவதில் முக்கிய பங்கு வகிப்பதாக தெரிவித்தார்.
அதேவேளை, ஆஸ்திரேலிய வெளியுறவு அமைச்சர் பென்னி வோங் உடனான சந்திப்பில், பாதுகாப்பு, வர்த்தகம், தொழில்நுட்பம் மற்றும் விநியோக சங்கிலி உறுதித்தன்மை உள்ளிட்ட துறைகளில் இந்தியா – ஆஸ்திரேலியா ஒத்துழைப்பை மேலும் விரிவுபடுத்துவது குறித்து ஆலோசிக்கப்பட்டது.
மேலும், சுதந்திரமான, திறந்த மற்றும் பாதுகாப்பான இந்தோ-பசிபிக் பிராந்தியத்தை உருவாக்குவதற்காக இந்தியாவும் ஆஸ்திரேலியாவும் தொடர்ந்து இணைந்து செயல்படும் என பிரதமர் மோடி வலியுறுத்தினார். குவாட் கூட்டமைப்பு, கடல்சார் பாதுகாப்பு, முக்கிய கனிம வளங்கள், உள்கட்டமைப்பு மற்றும் பொருளாதார பாதுகாப்பு உள்ளிட்ட துறைகளில் ஒத்துழைப்பை வலுப்படுத்தும் நோக்கில் செயல்பட்டு வருகிறது.
