26 மே 2026 : உலக இளம் கண்டுபிடிப்பாளர் கண்காட்சி 2026 (World Young Inventors Exhibition 2026) போட்டியில் கோலாலம்பூரிலுள்ள SMK கான்வென்ட் புக்கிட் நானாஸ் பள்ளி மாணவிகள் தங்கப் பதக்கம் வென்று மலேசியாவுக்கு பெருமை சேர்த்துள்ளனர்.
“Team Elcord Nexus” எனப் பெயரிடப்பட்ட அணியில் இடம்பெற்றிருந்த ஷிமியேதா இலங்கோ மற்றும் நெய்லெயா இலங்கோ ஆகிய மாணவிகள், தங்களின் புதுமையான கண்டுபிடிப்பு மற்றும் அறிவியல் திறமையின் மூலம் சர்வதேச அளவிலான இந்தப் போட்டியில் சிறப்பான வெற்றியைப் பதிவு செய்துள்ளனர்.
உலகம் முழுவதிலிருந்தும் கலந்து கொண்ட இளம் கண்டுபிடிப்பாளர்களுக்கு மத்தியில், இவர்களின் திட்டம் தனித்துவமான சிந்தனை, தொழில்நுட்ப அணுகுமுறை மற்றும் புதுமை திறன் ஆகியவற்றின் அடிப்படையில் உயர்ந்த மதிப்பீட்டை பெற்றதாக தெரிவிக்கப்பட்டுள்ளது.
“இளம் விஞ்ஞானிகள்” அமைப்பின் கீழ் நடைபெற்ற இந்த உலகளாவிய கண்டுபிடிப்பாளர் கண்காட்சி, இளம் தலைமுறையினரின் அறிவியல் ஆர்வத்தையும் புதுமை திறனையும் ஊக்குவிக்கும் முக்கிய தளமாகக் கருதப்படுகிறது.
மாணவிகளின் இந்த சாதனைக்கு பள்ளி நிர்வாகம், ஆசிரியர்கள், பெற்றோர் மற்றும் மாணவர்கள் மனமார்ந்த பாராட்டுகளைத் தெரிவித்துள்ளனர். இந்த வெற்றி, எதிர்காலத்தில் மேலும் பல சர்வதேச சாதனைகளுக்கான ஊக்கமாக அமையும் என நம்பப்படுகிறது.
