பினாங்கு, 17 மே 2026 : சிஜில் பெலஜரன் மலேசியா (SPM) 2025 தேர்வில் சிறப்பான முடிவுகளைப் பெற்ற 146 தலைசிறந்த இந்திய மாணவர்களைப் பாராட்டும் வகையில், பினாங்கு இந்து அறநிலைய வாரியம் (PHEB) சார்பில் “SPM சிறப்பு விருது வழங்கும் விழா 2025” சிறப்பாக நடைபெற்றது.
இந்த நிகழ்ச்சி தேவன் ராமகிருஷ்ண ஆசிரமத்தில் கோலாகலமாக நடைபெற்றது. விழாவில் பினாங்கு முதலமைச்சர் மாண்புமிகு துவான் சௌ கோன் இயோ தலைமையிலான பல முக்கிய பிரமுகர்கள் கலந்து கொண்டு மாணவர்களை வாழ்த்தினர்.
இவ்விழாவில் பினாங்கு இந்து அறநிலைய வாரியத்தின் தலைவர் மாண்புமிகு ஆர்.எஸ்.என். ரேயர், வீட்டுவசதி மற்றும் சுற்றுச்சூழல் மாநில செயற்குழு உறுப்பினர் மாண்புமிகு டத்தோ ஸ்ரீ சுந்தரஜூ சோமு, வாரியத்தின் துணைத் தலைவர் மாண்புமிகு செனட்டர் டாக்டர் லிங்கேஸ்வரன் அ/ல் டத்தோ ஸ்ரீ ஆர். அருணாசலம், மாண்புமிகு டத்தோ பொறியாளர் ராஜேந்திரன் பி. அந்தோணி, MBPP மேயர் மற்றும் MIC பினாங்கு மாநிலத் தலைவர் மாண்புமிகு டத்தோ ஜே. தினகரன், பினாங்கு இந்து அறநிலைய வாரிய செயலாளர் டாக்டர் விசாந்தினி கனசன் உள்ளிட்டோர் கலந்துகொண்டு விழாவை சிறப்பித்தனர்.
மேலும், பினாங்கு மலேசியா இந்துதர்ம மாமன்றத்தைச் சேர்ந்த திரு. தனபாலன் நந்த குமார் அவர்கள் அழைப்பின் பேரில் கலந்து கொண்டு மாணவர்களுக்கு வாழ்த்துகளைத் தெரிவித்தார்.
இந்த ஆண்டின் விருது பெறுநர்களில் 10 மாணவர்கள் 11A, 9 மாணவர்கள் 10A, 51 மாணவர்கள் 9A, 33 மாணவர்கள் 8A மற்றும் 42 மாணவர்கள் 7A பெற்றிருந்தனர். மாணவர்களின் கல்விச் சாதனையை ஊக்குவிக்கும் நோக்கில் பணப் பரிசுகளும் வழங்கப்பட்டன.
அதன்படி, 11A பெற்ற மாணவர்களுக்கு தலா RM500, 10A பெற்றவர்களுக்கு RM400, 9A பெற்றவர்களுக்கு RM350, 8A பெற்றவர்களுக்கு RM250 மற்றும் 7A பெற்றவர்களுக்கு RM200 வழங்கப்பட்டது. மேலும், மிக உயர்ந்த அங்கீகாரமாக RM1,000 மதிப்பிலான “சிறந்த மாணவர் விருது” வழங்கப்பட்டு சிறந்த மாணவர்கள் கௌரவிக்கப்பட்டனர்.
இந்த நிகழ்வு இந்திய மாணவர்களின் கல்வி முன்னேற்றத்திற்கான பினாங்கு இந்து அறநிலைய வாரியத்தின் தொடர்ச்சியான அர்ப்பணிப்பை வெளிப்படுத்துவதாகக் கருதப்படுகிறது.
