கோலாலம்பூர், 09 மே 2026 : சர்வதேச மலாய் மொழிப் பேச்சுப் போட்டியான PABM பிரதமர் கோப்பை 2026 போட்டியில் சர்வதேச இஸ்லாமிய பல்கலைக்கழகம் மலேசியா (IIUM), கோலாலம்பூர் பல்கலைக்கழகம் (UniKL )மற்றும் தாஷ்கண்ட் மாநில கீழைத்தேய ஆய்வுகள் பல்கலைக்கழகம் மாணவர்கள் வெற்றி பெற்று கவனம் பெற்றுள்ளனர்.
மலேசிய சுற்றுலா மையம் (MaTiC) வளாகத்தில் நடைபெற்ற இந்நிகழ்வின் நிறைவு விழாவில், உயர்கல்வி அமைச்சர் டத்தோ செரி டிராயா டாக்டர் சம்ப்ரி அப்துல் காதிர் உஸ்பெகிஸ்தானிலிருந்து இணையவழியாக உரையாற்றினார்.
அவர் தனது உரையில், மலாய் மொழி வெறும் தகவல் தொடர்பு கருவி மட்டுமல்லாமல், உலக மக்களை இணைக்கும் நாகரிகத்தின் பாலமாகவும், சிந்தனையின் ஊடகமாகவும் உயர்த்தப்பட வேண்டும் என வலியுறுத்தினார்.
செயற்கை நுண்ணறிவு (AI) மற்றும் வேகமான தகவல் பரிமாற்ற காலத்தில், துல்லியமான, நாகரிகமான மற்றும் கண்ணியமான மொழிப் பயன்பாடு மிகவும் அவசியம் என்றும், மொழி என்பது ஒரு சமூகத்தின் அறிவாற்றலையும், ஒரு தேசத்தின் நாகரிக முகத்தையும் பிரதிபலிப்பதாகவும் அவர் குறிப்பிட்டார்.
“பஹாசா மலாயு: ஜம்பத்தான் பெரடபன் குளோபல்” என்ற கருப்பொருளில் நடைபெற்ற இந்த 16வது பதிப்பில், 21 நாடுகளைச் சேர்ந்த 174 போட்டியாளர்கள் பங்கேற்றனர். இதன் மூலம் மலாய் மொழி, சர்வதேச அறிவுசார் வெளிப்பாட்டிற்கான வலுவான ஊடகமாக திகழும் திறனை மீண்டும் நிரூபித்துள்ளது. போட்டியின் மலேசியாவில் உள்ள சர்வதேச மாணவர்கள் (PAM) பிரிவில், UniKL-ஐ சேர்ந்த அம்னா மசூத் வெற்றியாளராகத் தேர்வானார்.
சர்வதேசப் பிரிவில், தாஷ்கண்ட் மாநில கீழைத்தேய ஆய்வுகள் பல்கலைக்கழகத்தைச் சேர்ந்த அப்துல்லாயேவா மதினாபோனு நிசோமிதீன் கிசி முதலிடம் பெற்றார்.
அதேவேளை, மலாய் உலகப் பிரிவில் IIUM-ஐ சேர்ந்த ஐனா பத்ரிசியா சுலைமான் சாம்பியன் பட்டத்தை வென்றார். மூன்று பிரிவுகளிலும் வெற்றி பெற்ற மாணவர்கள், சிறந்த மொழித்திறன், வலுவான தர்க்கவாதம் மற்றும் நம்பவைக்கும் உரைநடை ஆகியவற்றின் அடிப்படையில் தேர்வு செய்யப்பட்டனர். அவர்களுக்கு தலா RM10,000 ரொக்கப் பரிசும் பிரதமர் கோப்பையும் வழங்கப்பட்டது.
பரிசுகளை உயர்கல்வித் துறையின் (JPT) உயர்கல்வி (ஆளுகை மற்றும் மேம்பாடு) துணை தலைமை இயக்குநர் அஹ்மத் ரிசால் அட்னான் வழங்கினார்.
நிகழ்வில் JPT-யின் உயர்கல்வி (கல்வியியல் மற்றும் ஆராய்ச்சி) துணை தலைமை இயக்குநர் பேராசிரியர் டாக்டர் ஜைனல் அமின் அயோப், MARA குழுமத்தின் தற்காலிக தலைமை நிர்வாக அதிகாரி டத்தோ அமீர் அஸ்ஹர் இப்ராஹிம், யயாசான் பெர்காசா சிஸ்வாவின் தலைமை நிர்வாக அதிகாரி ஹிர்மான் அவாங் மற்றும் PABM 2026 திட்ட இயக்குநர் நார் ஐனா அகிலா அஹ்மத் ஃபட்சில் உள்ளிட்ட பலரும் கலந்து கொண்டனர்.
