கோலாலம்பூர், 08 மே 2026 : சிலாங்கூரில் பன்றிப் பண்ணைகள் திறப்பு தொடர்பாக சிலாங்கூர் சுல்தான் வெளியிட்டுள்ள உத்தரவை அனைத்து தரப்பினரும் மதித்து கடைப்பிடிக்க வேண்டும் என்று பெரிக்காத்தான் நேஷனலின் தகவல் தலைவர் டான் ஸ்ரீ அன்னூர் மூசா வலியுறுத்தியுள்ளார்.
அவர் வெளியிட்ட அறிக்கையில், அரண்மனை நிறுவனம் நாட்டின் இறையாண்மை மற்றும் மக்களின் நல்லிணக்கத்திற்கு அடித்தளமாக இருப்பதாக குறிப்பிட்டார். எனவே, சிலாங்கூர் சுல்தான் வழங்கியுள்ள உத்தரவுகள் அரசியல் தலைவர்கள் உட்பட அனைத்து தரப்பினராலும் மதிக்கப்பட வேண்டும் என்றார்.
சிலாங்கூரில் புதிய பன்றிப் பண்ணைகள் திறக்கப்படக்கூடாது என சுல்தான் தெளிவாக உத்தரவிட்டுள்ளதாகவும், அந்த உத்தரவு பொதுமக்களிடமிருந்தும் பரவலான ஆதரவைப் பெற்றுள்ளதாகவும் அவர் தெரிவித்தார்.
இருப்பினும், சில தரப்பினர் அந்த உத்தரவை முழுமையாகப் புரிந்துகொள்ளாமல் தொடர்ந்து அழுத்தம் கொடுத்து வருவதாக அவர் குற்றம்சாட்டினார். இதன் காரணமாக, சுல்தான் மீண்டும் உறுதியான விளக்கத்தை வெளியிட வேண்டிய நிலை ஏற்பட்டதாகவும் அவர் கூறினார்.
சிலாங்கூர் மாநிலத்தின் அதிக மக்கள் அடர்த்தி, பல இன மக்கள் வாழும் சமூக அமைப்பு மற்றும் சுற்றுச்சூழல் மாசுபாடு ஏற்படும் அபாயங்களை கருத்தில் கொண்டு தான் சுல்தான் இந்த முடிவை எடுத்துள்ளதாக அன்னூர் மூசா குறிப்பிட்டார்.
மேலும், புரதத் தேவைகளை பிற மாநிலங்கள் அல்லது நாடுகளிலிருந்து பெற்றுக்கொள்ளும் அணுகுமுறை, பொது சுகாதாரம், சுற்றுச்சூழல் தூய்மை மற்றும் சமூக நல்லிணக்கத்தை பாதுகாக்கும் பாதுகாப்பான வழி என்றும் அவர் தெரிவித்தார்.
சுல்தானின் நிலைப்பாடு தெளிவாக வெளியிடப்பட்ட பின்னரும் சில தரப்பினர் தொடர்ந்து பன்றிப் பண்ணைகள் திறப்பதற்கான முயற்சிகளை மேற்கொள்வது வருத்தமளிப்பதாகவும், அவர்கள் யாருடைய நலனை முன்னிலைப்படுத்துகின்றனர் என்ற கேள்வி எழுகிறது என்றும் அவர் கூறினார்.
மலாய் ஆட்சியாளர்கள் அமைப்பும் அரண்மனை நிறுவனமும் நாட்டின் நிலைத்தன்மை, நல்லிணக்கம் மற்றும் இறையாண்மையை பாதுகாக்கும் முக்கிய தூண்களாக இருப்பதாக தெரிவித்த அன்னூர் மூசா, அனைத்து தரப்பினரும் அந்த அமைப்புகளுக்கு உரிய மரியாதை வழங்க வேண்டும் என்று அழைப்பு விடுத்தார்.
