தஞ்சங் மாலிம், 26 ஏப்ரல் 2026 : உலகெங்கிலும் உள்ள கல்வியாளர்களின் பங்கேற்பை ஈர்க்கும் முயற்சியாக, 2026 ஆம் ஆண்டுக்கான உலகளாவிய கல்வியாளர் விருதின் (GEA) முக்கிய ஈர்ப்புகளில் ஒன்றாக, மொத்தம் 60,000 அமெரிக்க டாலர் நிதியுதவி வழங்கப்படுகிறது. சுல்தான் இத்ரிஸ் கல்விப் பல்கலைக்கழகத்தால் ஏற்பாடு செய்யப்பட்டுள்ள இந்த நிகழ்ச்சி, 80 நாடுகளிலிருந்து 1,000 பங்கேற்பாளர்களை இலக்காகக் கொண்டுள்ளது. இது, கடந்த ஆண்டு நடைபெற்ற முதல் பதிப்பில் 56 நாடுகளிலிருந்து 300-க்கும் மேற்பட்டோர் பங்கேற்றதை விட ஒரு அதிகரிப்பாகும்.
இந்த ஊக்கத்தொகை உலகளாவிய பங்கேற்பை ஊக்குவிப்பது மட்டுமின்றி, கல்வித் துறையில் புத்தாக்கத்திற்கும் வலுவூட்டுகிறது என்று உயர்கல்வி அமைச்சர் டத்தோ செரி டாக்டர் ஸம்ப்ரி அப்துல் காதிர் தெரிவித்தார். கல்வித் துறையில் ஒரு நூற்றாண்டுக்கும் மேலான அனுபவம் கொண்ட யுபிஎஸ்ஐ, இந்த சர்வதேசத் தரத்திலான திட்டத்தை ஏற்பாடு செய்வதற்கு ஒரு வலுவான அடித்தளமாக விளங்குகிறது என்று அவர் கூறினார். உலகெங்கிலும் உள்ள கல்வியாளர்கள், தாங்கள் மேற்கொண்ட முயற்சிகளின் அடிப்படையில் தத்தமது சாதனைகளைச் சமர்ப்பிப்பார்கள், அதிலிருந்து சிறந்தவை தேர்ந்தெடுக்கப்படும்.
அதே சமயம், மலேசியக் கல்வி முறையை சர்வதேச சமூகத்திற்கு வெளிச்சம் போட்டுக் காட்டவும் நம்மால் முடியும். எனவே, அவர்களின் வருகை உலகளாவிய விருதைப் பெறுவதற்காக மட்டுமல்ல, நமது நாட்டின் கல்வி முறையை அறிந்துகொள்வதற்காகவும் ஆகும். மலேசியக் கல்வி மாதிரி எவ்வாறு செயல்படுத்தப்படுகிறது என்பதைப் பார்ப்பதற்காக அவர்கள் பள்ளிகளுக்குச் செல்வார்கள்.
“அவர்கள் தத்தம் நாடுகளுக்குத் திரும்பும்போது, இந்த மாதிரியைத் தங்கள் தேசிய அளவில் எவ்வாறு பயன்படுத்தலாம் என்பதை அவர்களால் மதிப்பிட முடியும்,” என்று இங்குள்ள சுல்தான் இத்ரிஸ் கல்விப் பல்கலைக்கழகத்தில் (UPSI) நடைபெற்ற ஜோம் மசுக் யு 2026 நிறைவு விழா மற்றும் உலகளாவிய கல்வியாளர் விருது வழங்கும் விழாவை முடித்து வைத்த பிறகு அவர் ஊடகங்களிடம் கூறினார்.
2026 ஆம் ஆண்டு பதிப்பிற்காக, முன்பு இருந்த ஐந்து பிரிவுகளுக்குப் பதிலாக, டிஜிட்டல் புத்தாக்கம், அனைவரையும் உள்ளடக்கிய கல்வி, நிலைத்தன்மை மற்றும் உலகளாவிய ஒத்துழைப்பு ஆகியவற்றை உள்ளடக்கிய 10 பிரிவுகளில் போட்டிகள் நடத்தப்படும். வேட்புமனுக்கள் இன்று முதல் ஜூலை 15 வரை ஏற்கப்படும் நிலையில், தொடக்க விழாவை பிரதமர் டத்தோ செரி அன்வர் இப்ராஹிம் தொடங்கி வைப்பார் என எதிர்பார்க்கப்படுகிறது. GEA 2026 என்பது, உலகளாவிய கல்விச் சிறப்பை முன்னெடுத்துச் செல்வதில் கல்வியாளர்கள், கல்வி நிறுவனங்கள், ஆராய்ச்சியாளர்கள் மற்றும் தொழில்துறைப் பங்காளர்களின் பங்களிப்புகளை அங்கீகரிக்கும் ஒரு சர்வதேச அங்கீகார முன்னெடுப்பு ஆகும்.
