புதுடெல்லி, 06 ஏப்ரல் 2026 : அமெரிக்கா–ஈரான் மோதல் காரணமாக மேற்காசியாவில் ஒரு மாதத்திற்கு மேலாக பதற்றமான சூழல் நிலவி வருகிறது. இந்த நிலையில், வான்வழி தாக்குதல்கள் இடையிடையே நடைபெற்று வருவதால், பாதுகாப்பு காரணங்களும் பயணிகள் எண்ணிக்கை குறைந்ததும் விமான சேவைகள் பாதிக்கப்பட்டுள்ளன.
இதன் காரணமாக, இந்தியாவின் முன்னணி விமான நிறுவனமான Air India, புதுதில்லி–டெல் அவிவ் வழித்தடத்தில் தனது சேவைகளை மே 31ஆம் தேதி வரை தற்காலிகமாக நிறுத்துவதாக அறிவித்துள்ளது.
தற்போது, கடுமையான கட்டுப்பாடுகளுடன் இஸ்ரேல் நாட்டின் விமான நிறுவனங்கள் மட்டுமே குறைந்த அளவில் சேவைகளை வழங்கி வருகின்றன.
இந்த சேவை நிறுத்தம், இஸ்ரேலில் வசிக்கும் 40,000க்கும் மேற்பட்ட இந்தியர்களிடையே கவலை ஏற்படுத்தியுள்ளது. நாட்டை விட்டு வெளியேற விரும்பும் இந்தியர்கள், ஜோர்டான் அல்லது எகிப்து எல்லைகள் வழியாக தரைவழியில் பயணம் செய்து, அங்கிருந்து பிற நாடுகளுக்கு செல்ல வேண்டிய நிலை ஏற்பட்டுள்ளது.
இதனால் பயண நேரம் அதிகரிப்பதோடு, செலவுகளும் உயரும் சூழல் உருவாகியுள்ளது. பாதுகாப்பு காரணங்களால் எடுக்கப்பட்ட இந்த முடிவை, மீண்டும் பரிசீலிக்க வேண்டும் என பயணிகள் கோரிக்கை விடுத்துள்ளனர்.
