கோலாலம்பூர், 22 மார்ச் 2026 : மேற்கு ஆசியாவில் நிலவும் மோதல்களால் உலக எண்ணெய் விலைகள் அதிகரித்ததைத் தொடர்ந்து, அரசாங்க மானியங்கள் ஒரு வாரத்திற்கும் குறைவான காலத்தில் RM700 மில்லியனிலிருந்து RM3.2 பில்லியனாக அதிகரித்துள்ளன. மக்களைப் பாதுகாக்கும் பொருட்டு, BUDI MADANI RON95 (BUDI95) மற்றும் BUDI டீசல் திட்டங்கள் மூலம் அரசாங்கம் மானியங்களை வழங்கி வருவதாகவும், இதன்மூலம் மக்களும் பெரும்பாலான வர்த்தகர்களும் உண்மையான சந்தை விலையைச் செலுத்த வேண்டியதில்லை என்பது உறுதி செய்யப்படுவதாகவும் பிரதமர் டத்தோ செரி அன்வார் இப்ராஹிம் தெரிவித்தார்.
முகநூல் பதிவில் டத்தோ செரி அன்வர், குறிப்பாக பெருகிவரும் நிச்சயமற்ற உலகில், மக்களின் நலனையும் நல்வாழ்வையும் பாதுகாப்பதற்கான முயற்சிகளே மதானி அரசாங்கத்தின் முன்னுரிமையாகத் தொடர்கிறது என்று வலியுறுத்தினார்.
எண்ணெய் உற்பத்தி செய்யும் நாடான மலேசியாவும் பாதிக்கப்பட்டது, ஏனெனில் அந்நாட்டின் எண்ணெய் விநியோகத்தில் கிட்டத்தட்ட 50 சதவீதம் ஹோர்முஸ் ஜலசந்தி வழியாகவே செல்கிறது என்று அவர் மேலும் கூறினார்.
“மலேசியா ஒரு எண்ணெய் உற்பத்தி நாடாக இருந்தாலும், நாம் ஏற்றுமதி செய்வதை விட உண்மையில் அதிகமாக (எண்ணெயை) இறக்குமதி செய்கிறோம்,” என்று அவர் விளக்கினார். இதன் மூலம், ஒரு எண்ணெய் உற்பத்தி நாடாகிய மலேசியாவும் இந்தச் சூழ்நிலையால் ஏன் பாதிக்கப்பட்டுள்ளது என்ற கேள்விக்கு அவர் பதிலளித்தார். உலகின் பிரதான எண்ணெய் வழித்தடமான ஹோர்முஸ் ஜலசந்தி, அப்பகுதியில் நிலவும் மோதலால் பாதிக்கப்பட்டு, உலகின் எண்ணெய் விநியோகம் குறைந்து எரிபொருள் விலைகள் கடுமையாக உயர்ந்துள்ளதாக டத்தோ செரி அன்வர் தெரிவித்தார்.
பிப்ரவரி 28 அன்று அமெரிக்கா ஈரான் மீது தாக்குதல் நடத்தியதைத் தொடர்ந்து மேற்கு ஆசியாவில் மோதல் வெடித்தது.
இதற்குப் பதிலடியாக, ஈரான் சட்டவிரோத நாடான இஸ்ரேல் மீதும், அப்பகுதியில் உள்ள அமெரிக்க சொத்துக்கள் மீதும் தாக்குதல்களைத் தொடுத்தது.
உலகளாவிய எண்ணெய் மற்றும் எரிவாயு விநியோகத்திற்கான முக்கிய வழித்தடமான ஹோர்முஸ் ஜலசந்தியையும் ஈரான் மூடியது.
