கோலாலம்பூர், 23 நவம்பர் 2025 : கோலாலம்பூரில் ம.இ.கா தலைமையகத்தில் உள்ள நேத்தாஜி மண்டபத்தில் 22 நவம்பர் 2025 அன்று நடைபெற்ற மலர்விழி தி. ப. செழியன் அவர்களின் “நிலவாற்றுப்படை” நூல் வெளியீட்டு விழா எழுத்தாளர், படைப்பாளர், வாசகர் எனப் பெரும்திரளான பொதுமக்கள் பங்கேற்பில் சிறப்பாக நடைபெற்றது. மண்டபம் நிரம்பியிருந்தது நூலுக்கான வாசகர்கள் காட்டிய ஆர்வத்தை வெளிப்படுத்தியது.
இவ்விழா, ம.இ.கா தேசிய துணைத் தலைவரும் தாப்பா நாடாளுமன்ற உறுப்பினருமான டத்தோஸ்ரீ எம். சரவணன் அவர்களின் தலைமையில் நடைபெற்றது. தொடக்கமாக பூமகள் வழங்கிய இனிமையான வரவேற்புரை, அரங்கில் இருந்தவர்களை ஈர்த்தது. கவிஞர் சிவா நிகழ்ச்சி நெறியாளராக பணியாற்றி, துல்லியமான ஆளுகையால் விழாவுக்கு உயிரூட்டினார்.
வழங்கப்பட்ட வாழ்த்துரைகளில் வித்யாசகர், ஞான சைமன், டத்தோ வெள்ளையப்பன், கவிஞர் செல்வம், சாந்தா காளியப்பன் ஆகியோரின் உரைகள் விழாவின் தரத்தையும் உரையாடல்களின் ஆழத்தையும் உயர்த்தின. கவிஞர் இராஜமோகனின் சிறப்புக் கவிதை, நூலின் கலைச் செழுமையை அழகாக பிரதிபலித்தது.
நூலாசிரியர் மலர்விழி வழங்கிய ஏற்புரை விழாவுக்கு சிறப்பான நிறைவை அளித்தது. “நிலவாற்றுப்படை” என்ற படைப்பும், அதை மையமாகக் கொண்ட விழாவும், தமிழ் இலக்கியத்திற்கும் சமுதாயத்திற்கும் ஆக்கப்பூர்வமான பங்களிப்பாக அமைந்துள்ளது எனக் கூறப்பட்டது.
எழுத்தாளரின் தொடர்ந்த இலக்கியப் பயணம் மேலும் பல உயரங்களைத் தொடும் என்றும், எதிர்காலப் படைப்புகள் வாசகர்களால் ஆவலுடன் எதிர்நோக்கப்படுகின்றன என்றும் விழாவில் வலியுறுத்தப்பட்டது.
