கோலாலம்பூர், 21 அக்டோபர் 2026 : மலேசியப் பிரதமரும் நிதி அமைச்சருமான டத்தோ ஸ்ரீ அன்வார் இப்ராஹிம், நிதி அமைச்சகத்தின் மாதாந்திரக் கூட்டத்தில் இன்று உரையாற்றியபோது, மக்களுக்குச் செய்யும் சேவையில் அனைத்து அமைச்சகப் பணியாளர்களும் தங்களது பொறுப்பையும் கடமையையும் உறுதியுடன் நிறைவேற்ற வேண்டும் என்று வலியுறுத்தினார். விமர்சனங்கள் தங்களின் மக்கள் சேவைக்கான உறுதியைச் சிதைக்க அனுமதிக்கக் கூடாது என்றும் அவர் கேட்டுக்கொண்டார்.
மேலும், 2027ஆம் ஆண்டுக்கான வரவு செலவுத் திட்டத்தைத் தயாரிப்பதில் கடின உழைப்பையும் அர்ப்பணிப்பையும் வெளிப்படுத்திய நிதி அமைச்சகப் பணியாளர்களுக்குப் பிரதமர் தனது பாராட்டுகளையும் தெரிவித்தார்.
‘மலேசியா மடானி: வானளாவிய இலக்கு, மண்ணில் வேரூன்றிய வளர்ச்சி’ என்ற கருப்பொருளில் உருவாக்கப்பட்டுள்ள 2027ஆம் ஆண்டுக்கான வரவு செலவுத் திட்டம், அரசாங்கத்திற்கும் மக்களுக்கும் இடையிலான பகிரப்பட்ட பொறுப்பை வலியுறுத்துகிறது. நாட்டின் வளர்ச்சியின் பலன்கள் அனைத்து மக்களுக்கும் நலனையும் வளத்தையும் கொண்டுசேர்ப்பதே இதன் முக்கிய நோக்கமாகும்.
2026ஆம் ஆண்டின் இரண்டாவது காலாண்டில் மலேசியாவின் மொத்த உள்நாட்டு உற்பத்தி (GDP) வளர்ச்சி 6.0 விழுக்காட்டை எட்டியிருப்பது, நாட்டின் பொருளாதார முன்னேற்றத்தைத் தொடர்ந்து வலுப்படுத்துவதற்கான முக்கிய அடித்தளங்களில் ஒன்றாகப் பிரதமர் சுட்டிக்காட்டினார்.
இலக்கு நிர்ணயிக்கப்பட்ட மானியங்களைச் செயல்படுத்துதல், STR மற்றும் SARA போன்ற உதவித் திட்டங்களை மேம்படுத்துதல், நாட்டின் கடனைப் பொறுப்புடன் நிர்வகித்தல் மற்றும் நிதிப் பற்றாக்குறையைப் படிப்படியாகக் குறைத்தல் ஆகியவை நிதி அமைச்சகத்தின் முக்கிய முன்னுரிமைகளாக உள்ளன.
அரசாங்கக் கொள்முதல் சட்டத்தின் மூலம் நிர்வாகச் சீர்திருத்தங்களை முன்னெடுத்தல், அரசுக்குச் சொந்தமான நிறுவனங்களின் நிர்வாகத்தை வலுப்படுத்துதல் ஆகிய நடவடிக்கைகளும் பொது நிதி நிர்வாகத்தில் வெளிப்படைத்தன்மையையும் பொறுப்புணர்வையும் மேம்படுத்தும் என எதிர்பார்க்கப்படுகிறது.
நாட்டின் நிதி நிர்வாகத்தைச் சீராகவும் பொறுப்புடனும் முன்னெடுப்பதன் மூலம், வளர்ச்சித் திட்டங்களின் பலன்கள் மக்களைச் சென்றடைவதை உறுதிப்படுத்த அனைத்து நிதி அமைச்சகப் பணியாளர்களும் ஒருங்கிணைந்து தொடர்ந்து பணியாற்றுவார்கள் என்றும் தெரிவிக்கப்பட்டது.
