கோலாலம்பூர், 20 அக்டோபர் 2026 : கோலாலம்பூர், பத்து நாடாளுமன்றத் தொகுதியின் அக்கம்பக்கக் கண்காணிப்புக் குழுக்களின் (KRT) உறுப்பினர்களுக்கான சிறப்பு சந்திப்பு நிகழ்ச்சி, கேலக்ஸி விருந்து மண்டபத்தில் நடைபெற்றது. இதில் நாடாளுமன்ற உறுப்பினர் பிரபாகரன் எம். பரமேஸ்வரனுடன் இணைந்து யுனேஸ்வரன் ராமராஜ் கலந்துகொண்டார்.
நிகழ்ச்சியில் பேசிய யுனேஸ்வரன், சமூகப் பாதுகாப்பைப் பேணுவதிலும், மக்களிடையே ஒற்றுமையை வளர்ப்பதிலும் KRT அமைப்புகள் முக்கியப் பங்காற்றுவதாகக் குறிப்பிட்டார். அக்கம்பக்க நடவடிக்கைகளை ஏற்பாடு செய்வதுடன், சமூக மோதல்களைத் தீர்ப்பது, பதற்றத்தைத் தணிப்பது, சமூக ஊடகங்களில் பரவும் இன உணர்வுப் பிரச்சினைகளைக் கையாள்வது போன்ற பணிகளிலும் அவை ஈடுபட வேண்டும் என்றார்.
மேலும், KRT தலைவர்களுக்கான பயிற்சிகளை வலுப்படுத்துதல், தேவையான நிதியுதவிகளை வழங்குதல், இளைஞர்கள் மற்றும் பெண்கள் சமூக நிர்வாகத்தில் தங்களின் திறமைகளையும் கருத்துகளையும் பங்களிக்க அதிக வாய்ப்புகளை ஏற்படுத்துதல் ஆகியவற்றின் அவசியத்தையும் அவர் வலியுறுத்தினார்.
நிகழ்ச்சியின் போது, தன்னார்வ அக்கம்பக்கக் கண்காணிப்புத் திட்டத்தின் (SRS) உறுப்பினர்கள் பயன்படுத்தும் சிவப்பு ஒளி கொண்ட போக்குவரத்துக் கட்டுப்பாட்டுக் கம்பியைப் பார்த்து, அது ஸ்டார் வார்ஸ் திரைப்படத்தின் லைட்சேபர் போல இருப்பதாக நகைச்சுவையாகக் குறிப்பிட்டார்.
சமூகத்தின் பாதுகாப்பையும் நல்லிணக்கத்தையும் பேணுவதற்கு அனைவரும் ஒன்றிணைந்து செயல்பட வேண்டும் என்றும் யுனேஸ்வரன் கேட்டுக்கொண்டார்.
