கோலாலம்பூர், 15 அக்டோபர் 2026 : மலேசியாவின் பன்முக இன, மத மற்றும் கலாசார அடையாளத்தைப் பாதுகாக்க, இனவாதம், தப்பெண்ணம் மற்றும் பாகுபாடுகளுக்கு எதிராக அனைவரும் ஒன்றிணைந்து செயல்பட வேண்டும் என யுனேஸ்வரன் ராமராஜ் வலியுறுத்தியுள்ளார்.
Pusat KOMAS அமைப்பு ஏற்பாடு செய்த 13-ஆவது தேசிய பாகுபாடு எதிர்ப்பு மாநாட்டில் (National Conference on Anti-Discrimination) அவர் முக்கிய உரையாற்றினார்.
இம்மாநாட்டில் Pusat KOMAS இயக்குநர் ஜெரால்ட் ஜோசப், மலேசியா, சிங்கப்பூர் மற்றும் புருணைக்கான ஐக்கிய நாடுகள் சபையின் வதிவிட ஒருங்கிணைப்பாளர் நிக்கோலஸ் மைன்ட், ஐ.நா. மனித உரிமைகள் உயர் ஆணையர் அலுவலகத்தின் ஆசிய–பசிபிக் பிராந்திய இனப் பாகுபாடு எதிர்ப்பு ஆலோசகர் ஹனே ஹன்சாவா மற்றும் மலேசிய மனித உரிமைகள் ஆணையத்தின் (SUHAKAM) ஆணையர் மெலிசா அகிர் உள்ளிட்டோர் கலந்துகொண்டனர். அரசாங்க அமைப்புகளின் பிரதிநிதிகள், தூதர்கள், சமூக அமைப்புகள், மாணவர்கள் மற்றும் மாநாட்டுப் பேச்சாளர்களும் பங்கேற்றனர்.
தனது உரையில், ஒற்றுமை என்பது ஒரே நாட்டில் ஒன்றாக வாழ்வது மட்டுமல்ல; ஒருவரையொருவர் மதித்து, புரிந்துகொண்டு, அனைவருக்கும் சமமான வாய்ப்புகளை வழங்குவதுமாகும் என யுனேஸ்வரன் குறிப்பிட்டார்.
சமூகப் பொருளாதார ஏற்றத்தாழ்வுகளைக் குறைத்து, பாகுபாட்டின் காரணமாக எந்தவொரு குடிமகனும் புறக்கணிக்கப்படாத நிலையை உருவாக்க வேண்டும் என்றும் அவர் வலியுறுத்தினார்.
மேலும், சமூகத் தலைவர்கள், அரசு சாரா அமைப்புகள் மற்றும் சமூக ஊடகப் பிரபலங்கள் இன, மத விவகாரங்களை வெறுப்பைத் தூண்டுவதற்கோ தனிப்பட்ட ஆதாயங்களைப் பெறுவதற்கோ பயன்படுத்தக் கூடாது எனக் கேட்டுக்கொண்டார்.
கருத்துகள், கலாசாரம் மற்றும் நம்பிக்கைகளில் வேறுபாடுகள் இருந்தாலும், அவை மக்களிடையேயான உறவுகளைச் சீர்குலைக்கக் கூடாது என்றும், மலேசியாவின் தேசியக் கொள்கையான ருக்குன் நெகாராவின் அடிப்படையில் சமூக நல்லிணக்கத்தையும் நீதியையும் வலுப்படுத்த அனைவரும் பங்களிக்க வேண்டும் என்றும் அவர் தெரிவித்தார்.
மலேசியா அனைவருக்கும் பொதுவான தாயகம் எனக் குறிப்பிட்ட யுனேஸ்வரன், வேறுபாடுகள் மக்களைப் பிரிப்பதற்குப் பதிலாக, சிறந்த எதிர்காலத்தை உருவாக்குவதற்கான பலமாக அமைய வேண்டும் என்றார். நாட்டின் ஒற்றுமையைப் பேணுவது அரசாங்கத்தின் பொறுப்பு மட்டுமல்ல; ஒவ்வொரு குடிமகனின் பொறுப்புமாகும் என்றும் அவர் வலியுறுத்தினார்.
