பிரிக்பீல்ட்ஸ், 14 அக்டோபர் 2026 : மலேசியாவின் கோலாலம்பூர் மற்றும் பிரிக்ஃபீல்ட்ஸ் பகுதிகளில் தீபாவளி அலங்கார பதாகைகளில் பயன்படுத்தப்பட்டுள்ள ‘DIWALI’ என்ற சொல்லை நீக்கி, ‘DEEPAVALI’ என மாற்ற வேண்டும் எனக் கோரி கூட்டரசுப் பிரதேச மலேசிய இந்திய காங்கிரஸ் (மஇகா) உறுப்பினர்கள் பிரிக்ஃபீல்ட்ஸில் அமைதிப் போராட்டத்தில் ஈடுபட்டனர்.
மலேசிய மஇகா துணைத் தலைவர் டத்தோஸ்ரீ டாக்டர் எம். சரவணன், மலேசியாவில் இப்பண்டிகைக்கான அதிகாரப்பூர்வமாகப் பதிவுசெய்யப்பட்ட பெயர் ‘DEEPAVALI’ என்றும், அதையே அரசு அலங்காரங்களிலும் பதாகைகளிலும் பயன்படுத்த வேண்டும் என்றும் வலியுறுத்தியுள்ளார். இது தொடர்பாக கூட்டரசுப் பிரதேசங்களுக்குப் பொறுப்பான அமைச்சர் ஹன்னா இயோவுக்கு அவர் கடிதம் அனுப்பியதுடன், அதன் நகலைப் பிரதமர் அன்வார் இப்ராஹிமுக்கும் அனுப்பியுள்ளார்.
மலேசிய இந்தியர்களில் பெரும்பான்மையினர் தென்னிந்திய வம்சாவளியைச் சேர்ந்தவர்கள் என்றும், அவர்களின் மொழி மற்றும் பண்பாட்டு அடையாளத்தை ‘DEEPAVALI’ என்ற சொல் சிறப்பாகப் பிரதிபலிப்பதாகவும் சரவணன் தெரிவித்துள்ளார். ‘DIWALI’ என்பது வடஇந்தியாவில், குறிப்பாக இந்தி பேசும் சமூகங்களிடையே பரவலாகப் பயன்படுத்தப்படும் பெயர் என்றும் அவர் குறிப்பிட்டுள்ளார்.
இது வெறும் சொல் பயன்பாடு தொடர்பான விவகாரம் மட்டுமல்ல; மலேசியத் தமிழர்களின் மொழி, பண்பாடு மற்றும் மரபுக்கு உரிய மதிப்பளிப்பது தொடர்பானது என்றும் அவர் வலியுறுத்தியுள்ளார். எனவே, கோலாலம்பூர் முழுவதும் உள்ள அலங்கார வளைவுகள் மற்றும் பதாகைகளில் ‘DIWALI’ என்ற சொல்லுக்குப் பதிலாக ‘DEEPAVALI’ என உடனடியாக மாற்றவும், எதிர்கால அதிகாரப்பூர்வ அறிவிப்புகளிலும் அதையே பயன்படுத்தவும் அவர் கோரிக்கை விடுத்துள்ளார்.
