கோலாலம்பூர், 12 அக்டோபர் 2026 : 2026ஆம் ஆண்டுக்கான மலேசிய எஃப்.ஏ. கோப்பைக் கால்பந்துப் போட்டியின் அரையிறுதிச் சுற்றுக்கு சிலாங்கூர் எஃப்.சி. மற்றும் புருணையைச் சேர்ந்த டி.பி.எம்.எம். எஃப்.சி. அணிகள் தகுதி பெற்றுள்ளன. இரு அணிகளும் தங்களது காலிறுதிப் போட்டிகளில் ஒட்டுமொத்த கோல் கணக்கில் வெற்றி பெற்று அடுத்த சுற்றுக்கு முன்னேறின.
பெட்டாலிங் ஜெயா நகராட்சி மைதானத்தில் நடைபெற்ற இரண்டாவது காலிறுதிப் போட்டியில் சிலாங்கூர் எஃப்.சி. அணி, ஸ்டார் சிட்டி எஃப்.சி. அணியிடம் 2-3 என்ற கோல் கணக்கில் தோல்வியடைந்தது. இருப்பினும், முதல் போட்டியில் பெற்ற முன்னிலையுடன் சேர்த்து 6-4 என்ற ஒட்டுமொத்த கோல் கணக்கில் வெற்றி பெற்று அரையிறுதிக்கு முன்னேறியது.
சொந்த மைதானத்தில் விளையாடிய சிலாங்கூர் அணி, ஆட்டத்தின் 9-ஆவது நிமிடத்தில் ஸிக்ரி கலீலி மூலம் முதல் கோலைப் பதிவு செய்தது. தொடர்ந்து விட்டோர் பெர்னாம்புகோ கோல் அடிக்க, முதல் பாதியில் சிலாங்கூர் அணி 2-0 என முன்னிலை பெற்றது.
இரண்டாவது பாதியில் எழுச்சி பெற்ற ஸ்டார் சிட்டி அணிக்காக 62-ஆவது நிமிடத்தில் மோசஸ் அடேடே கோல் அடித்தார். பின்னர் பெட்ரோ சாண்டோஸ் சமநிலையை ஏற்படுத்தினார். ஆட்டத்தின் இறுதிப் பகுதியில் ரமோன் மச்சாடோ மேலும் ஒரு கோல் அடித்து ஸ்டார் சிட்டி அணிக்கு 3-2 என்ற வெற்றியைத் தேடித்தந்தார். எனினும், ஒட்டுமொத்த கோல் கணக்கில் சிலாங்கூர் அணியின் முன்னிலையை முறியடிக்க அந்த வெற்றி போதுமானதாக அமையவில்லை.
இதன் மூலம் கிம் பான் கோன் பயிற்சியிலான சிலாங்கூர் அணி, அரையிறுதியில் கூச்சிங் சிட்டி எஃப்.சி. அணியை எதிர்கொள்ளவுள்ளது. இதற்கிடையே, கோலாலம்பூர் செராஸ் கால்பந்து மைதானத்தில் நடைபெற்ற மற்றொரு காலிறுதிப் போட்டியில் புருணையைச் சேர்ந்த டி.பி.எம்.எம். எஃப்.சி. அணி, கோலாலம்பூர் சிட்டி எஃப்.சி. அணியை 1-0 என்ற கோல் கணக்கில் வீழ்த்தியது.
ஆட்டத்தின் 11-ஆவது நிமிடத்தில் டாமி மாவாட் பாடா வழங்கிய நீண்ட தூரப் பந்தைப் பயன்படுத்தி ஜோர்டன் முர்ரே கோல் அடித்தார். இரு அணிகளுக்கும் இடையிலான முதல் காலிறுதிப் போட்டி 3-3 என்ற கோல் கணக்கில் முடிவடைந்திருந்த நிலையில், இந்த வெற்றியின் மூலம் டி.பி.எம்.எம். அணி 4-3 என்ற ஒட்டுமொத்த கோல் கணக்கில் அரையிறுதிக்குத் தகுதி பெற்றது. அரையிறுதியில் நடப்புச் சாம்பியனான ஜொகூர் தாருல் தாசிம் (ஜே.டி.டி.) அணியை டி.பி.எம்.எம். எஃப்.சி. எதிர்கொள்ளவுள்ளது.
