புத்ராஜெயா, 08 அக்டோபர் 2026 : மியான்மர் அதிபர் ஜெனரல் மின் ஆங் ஹ்லைங் மலேசியாவுக்கு இரண்டு நாள் அதிகாரப்பூர்வ பயணம் மேற்கொண்ட நிலையில், இரு நாடுகளுக்கும் பொதுவான முக்கிய விவகாரங்கள் குறித்து கருத்துப் பரிமாற்றம் நடைபெற்றது.
மலேசியா வந்த மியான்மர் அதிபருக்கு புத்ராஜெயாவில் அதிகாரப்பூர்வ வரவேற்பு அளிக்கப்பட்டது. இதனைத் தொடர்ந்து மலேசிய பிரதமர் டத்தோஸ்ரீ அன்வார் இப்ராஹிம் மற்றும் மின் ஆங் ஹ்லைங் இடையே தனிப்பட்ட சந்திப்பும், இருதரப்பு பேச்சுவார்த்தையும் நடைபெற்றது.
இந்தச் சந்திப்பின்போது இரு நாடுகளுக்கும் பொதுவான பல்வேறு விவகாரங்கள் குறித்து கருத்துகள் பரிமாறப்பட்டதாக யுனேஸ்வரன் ராமராஜ் தெரிவித்துள்ளார். குறிப்பாக, மனிதாபிமான விவகாரங்கள் மற்றும் மலேசியாவில் உள்ள மியான்மர் அகதிகள் தொடர்பான பிரச்சினைகள் குறித்தும் கவனம் செலுத்தப்பட்டதாக அவர் குறிப்பிட்டார்.
அமைதி மற்றும் நல்லிணக்கத்தை முன்னிறுத்தும் நாடாக மலேசியா, பிரச்சினைகளுக்கு தீர்வு காண பேச்சுவார்த்தை மற்றும் கலந்துரையாடல் அணுகுமுறைக்கு தொடர்ந்து முக்கியத்துவம் அளித்து வருவதாக யுனேஸ்வரன் ராமராஜ் தெரிவித்தார்.
மேலும், இரு நாடுகளுக்கும் இடையிலான உறவுகளும் ஒத்துழைப்பும் தொடர்ந்து பிராந்திய நிலைத்தன்மைக்கும் பொதுவான நலன்களுக்கும் பங்களிக்க வேண்டும் என்றும் அவர் நம்பிக்கை தெரிவித்தார். மலேசியா–மியான்மர் பேச்சுவார்த்தைகளில் இரு நாடுகளின் உறவுகள், மனிதாபிமான விவகாரங்கள் மற்றும் மியான்மர் குடிமக்களைத் திருப்பி அனுப்புவது உள்ளிட்ட அம்சங்கள் இடம்பெற்றதாக அதிகாரப்பூர்வ தகவல்கள் தெரிவிக்கின்றன.
