கோலாலம்பூர், 08 அக்டோபர் 2026 : மதானி 2027 பட்ஜெட்டின் நோக்கம் மற்றும் மக்களுக்கான அரசின் நடவடிக்கைகள் குறித்து பிரதமரும் நிதியமைச்சருமான டத்தோஸ்ரீ அன்வார் இப்ராஹிம் ஊடகப் பிரதிநிதிகளுக்கு விளக்கமளித்தார்.
நாட்டின் பொருளாதாரம் தொடர்ந்து வலுப்படுத்தப்பட வேண்டும் என்பதுடன், பொருளாதார வளர்ச்சியின் பலன் மக்களின் வாழ்க்கைத் தரத்தை மேம்படுத்தும் வகையில் அமைய வேண்டும் என்பதே மதானி அரசின் ஐந்தாவது பட்ஜெட்டின் முக்கிய நோக்கம் என அன்வார் இப்ராஹிம் தெரிவித்தார்.
பொருளாதார வளர்ச்சி மட்டும் போதாது என்றும், வாழ்க்கைச் செலவு அதிகரிப்பால் மக்கள் தொடர்ந்து அழுத்தங்களை எதிர்கொண்டால், அவர்களின் சுமையை குறைப்பதற்கான நடவடிக்கைகள் அவசியம் என்றும் அவர் குறிப்பிட்டார்.
அதன்படி, 2027 பட்ஜெட்டில் மக்களின் சுமையை குறைத்தல், அவர்களைப் பாதுகாத்தல், புதிய வாய்ப்புகளை உருவாக்குதல் மற்றும் நாட்டின் வளர்ச்சியின் பலன்கள் அனைவருக்கும் நியாயமான முறையில் சென்றடைவதை உறுதி செய்தல் ஆகியவற்றுக்கு தொடர்ந்து முக்கியத்துவம் அளிக்கப்படும் என்று அவர் கூறினார்.
மதானி 2027 பட்ஜெட்டின் முழுமையான விவரங்களை வரும் வெள்ளிக்கிழமை வெளியிடவுள்ளதாகவும் அன்வார் இப்ராஹிம் தெரிவித்தார். மக்களின் நலனை முன்னிறுத்தி மேற்கொள்ளப்படும் அனைத்து முயற்சிகளும் சிறப்பாகவும் இறையருளுடனும் நிறைவேற வேண்டும் என்றும் அவர் வாழ்த்தினார்.
