கோலாலம்பூர், 07 அக்டோபர் 2026 : மலேசியாவின் பல பகுதிகளில் காற்று மாசு தொடர்ந்து காணப்படும் நிலையில், இன்று காலை 9 மணி நிலவரப்படி நாடு முழுவதும் 35 பகுதிகளில் காற்று மாசுக் குறியீடு (IPU) ஆரோக்கியமற்ற நிலையில் பதிவாகியுள்ளது.
மலேசிய சுற்றுச்சூழல் துறையின் (JAS) தகவலின்படி, மேலும் 31 பகுதிகளில் காற்றுத் தரம் மிதமான நிலையில் இருந்ததுடன், 2 பகுதிகளில் நல்ல நிலையில் பதிவாகியுள்ளது. மிகவும் ஆரோக்கியமற்ற நிலைக்கான (IPU 201-300) பதிவு எதுவும் காலை 9 மணி நிலவரப்படி இல்லை.
அதிகபட்சமாக ஜோகூர் மாநிலத்தின் பத்து பஹாட் மற்றும் சிலாங்கூரின் ஜோஹான் செத்தியா ஆகிய இரு பகுதிகளிலும் IPU 190 ஆகப் பதிவாகியுள்ளது. இதனைத் தொடர்ந்து கோலாலம்பூரின் செராஸ் மற்றும் நெகிரி செம்பிலானின் நிலாய் ஆகிய பகுதிகளில் தலா 189 ஆகவும், புத்ராஜெயாவில் 187 ஆகவும் பதிவாகியுள்ளது.
ஆரோக்கியமற்ற காற்றுத் தரம் பதிவான பகுதிகளில் சிலாங்கூரின் ஷா ஆலம், பெட்டாலிங் ஜெயா, பந்திங் மற்றும் கிளாங்; ஜோகூரின் செகாமாட், பாசிர் குடாங், தங்காக், லார்கின், பெங்கராங், கோத்தா திங்கி மற்றும் குளுவாங்; மலாக்காவின் புக்கிட் ரம்பாய், அலோர் காஜா மற்றும் பண்டாராயா மலாக்கா ஆகியவையும் அடங்குகின்றன.
மேலும், நெகிரி செம்பிலான், பஹாங், திரங்கானு, பேராக், சபா மற்றும் சரவாக் மாநிலங்களின் சில பகுதிகளிலும் IPU ஆரோக்கியமற்ற நிலையில் பதிவாகியுள்ளது. IPU 101 முதல் 200 வரை இருந்தால் அது ஆரோக்கியமற்ற காற்றுத் தரமாக வகைப்படுத்தப்படுகிறது.
காற்றுத் தர நிலவரம் தொடர்ந்து கண்காணிக்கப்பட்டு வரும் நிலையில், பொதுமக்கள் அதிகாரப்பூர்வ தகவல்களைப் பின்பற்றி தேவையான முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்படுகின்றனர்.
