கோலாலம்பூர், 05 அக்டோபர் 2026 : இந்திய சமூகத்தைச் சேர்ந்த குறுந்தொழில் முனைவோருக்கு உதவும் வகையில் மலேசிய அரசு அறிவித்துள்ள RM30 மில்லியன் மதிப்பிலான ‘பெர்காட் தீபாவளி’ சிறப்பு நிதித் திட்டத்தை கோலாலம்பூர் மற்றும் சிலாங்கூர் இந்திய வர்த்தக மற்றும் தொழில்துறைச் சம்மேளனம் (KLSICCI) வரவேற்றுள்ளது.
தொழில்முனைவோர் மேம்பாடு மற்றும் கூட்டுறவுத் துறை அமைச்சர் ஸ்டீவன் சிம் சீ கியோங், டெகுன் நேஷனல் (TEKUN Nasional) மூலம் இந்த சிறப்பு நிதித் திட்டத்தை அறிவித்துள்ளார். தீபாவளி நவம்பர் 8-ம் தேதி கொண்டாடப்பட உள்ள நிலையில், முன்கூட்டியே திட்டம் அறிவிக்கப்பட்டிருப்பது சிறு வணிகர்கள், தெருவோர வியாபாரிகள் மற்றும் தீபாவளி சந்தை வியாபாரிகள் தங்களது வணிகத்துக்குத் தேவையான மூலதனத்தை திரட்டவும், பொருட்களை இருப்பு வைக்கவும் உதவும் என KLSICCI தெரிவித்துள்ளது.
இந்தத் திட்டத்தின் கீழ் அதிகபட்சமாக RM30,000 வரை நிதியுதவி வழங்கப்படுகிறது. ஆண்டுக்கு 3 சதவீத லாப விகிதத்தில், 12 மாதங்கள் வரை திருப்பிச் செலுத்தும் வகையில் இந்த நிதியுதவி வழங்கப்படும். உணவு மற்றும் பானங்கள், ஆடைகள், தீபாவளி தொடர்பான பொருட்கள் உள்ளிட்ட துறைகளில் உள்ள சிறு வணிகர்கள் இதனைப் பயன்படுத்திக்கொள்ளலாம்.
மேலும், RM100,000-க்கும் குறைவான நிதியுதவி விண்ணப்பங்களுக்கு 7 நாட்களுக்குள் முடிவு எடுக்கப்படும் என அமைச்சகம் தெரிவித்துள்ளது. குறைந்த கடன் மதிப்பீடு கொண்ட விண்ணப்பதாரர்களுக்கும் பணப்புழக்கம் உள்ளிட்ட மாற்று மதிப்பீட்டு முறைகளைப் பயன்படுத்தி விண்ணப்பங்களை பரிசீலிக்க நடவடிக்கை எடுக்கப்படும் என தெரிவிக்கப்பட்டுள்ளது.
இந்திய தொழில்முனைவோருக்கு தொடர்ந்து கவனம் செலுத்தி வரும் பிரதமர் அன்வார் இப்ராகிம் தலைமையிலான அரசுக்கும், திட்டத்தை விரைவாக செயல்படுத்த நடவடிக்கை எடுத்த அமைச்சர் ஸ்டீவன் சிம் சீ கியோங்கிற்கும் KLSICCI தலைவர் வி.கே.கே. ராஜசேகரன் தியாகராஜன் நன்றி தெரிவித்துள்ளார்.
இந்தத் திட்டத்தின் விவரங்களை தங்களது உறுப்பினர்கள் மற்றும் வணிகர்கள் மத்தியில் கொண்டு சேர்ப்பதுடன், விண்ணப்பிப்பதற்கும் உதவி செய்ய KLSICCI நடவடிக்கை எடுக்க உள்ளது.
‘பெர்காட் தீபாவளி’ திட்டத்துக்கான விண்ணப்பங்கள் அக்டோபர் 3 முதல் நவம்பர் 8, 2026 வரை பெறப்படுகின்றன. மலேசிய இந்திய சமூகத்தைச் சேர்ந்த 18 முதல் 65 வயதுக்குட்பட்ட குடிமக்கள் விண்ணப்பிக்கலாம். TEKUN-ன் இணையவழி விண்ணப்ப முறை அல்லது நாடு முழுவதும் உள்ள TEKUN கிளைகள் மூலம் விண்ணப்பங்களைச் சமர்ப்பிக்கலாம்.
